Basultu Nang Apung Amor

BASULTU nang Apung Amor

neng Almario "amor" C. de Jesus

Potang magkera ca, agad meng capcapan

Itang Casiping mu king daseng pagkeran,

Istung atalan me, agad meng salacban

Ditac mung pinandit, matudtud maniaman.

Cagising nang Edgar, e ya mitalacad,

Mangilambut ya pa, cacalu ya ing tud,

Malasadung ebun, at gatas damulag

Inyad nang almusal, inapag da papag.

Ing baracung cape, king pali bubucal

Inalduc nang bigla, mepaltus ya bagang

Inya ing gewa na, brandy semutanan

Abac a maranun, melasing ne naman.

Mibalic, migcasat king cayang pagkeran

Ing balac na sana, mangapcap ne naman,

Dapot ing milyari, agad melacac ya.

Anya mig-Absent ya keta nang obra na.

E na ca mengari ketang tau Capas

tinanam yang pacwan, memmunga yang ubas

Anyang mamupul ya at gawa yang alac

E na pu a inum, tictac pu king calat.

E na ca mengari, king tau Masicu

cagising neng abac magpastul damulag,

cabang manyuga ya paneyang cacanta

basult't pulosa, pililiwasan na.

E na mengari keng tau Apalit,

Alang balung gawan nung e mu mangalbit

Atin pung linabas ot kilbit ne buldit

Anyang abante re, agad memulandit.

Pututan ke ne pa, ing pamag basultu

Deti nang darandam, pota mainsultu

Dalit cung aliwa, at e macatula

Sinta king dalaga, cacung ipaswala.

&************&

ALMARIO "amor" C DE JESUS -

(Mibait bulan na ning Mayo)

*

Penata nacung Inda cu cang mal a Santo Antonio.

Anya istung sisimba cu macasulud mamilucu,

Caretang taung manakit, ing sabi da mag-pari cu,

Dapot anyang meragul na, aburi cu Abogadu;

**

Sasabian da detang Pari, manyabi la ping catutwan,

At den namang abogadu,ating ditac calaraman,

Neng metung cung Capampangan, tetac cu king caisipan,

Magaral cung mamalangcas, at lalang ping cawatasan;

***

Kening delanan cu ping bye, maragul cu pasalamat,

Macasuyu king Amanu, gagambul a misnang tapat,

Agya mang mipalaut cu, sumangid dagat linipat,

Ing tibuan cung kebaitan, kening pusu macalapat.

****

Pangadi cu king Miglalang, midinan sang catuparan,

Anguanan na ining bie cu, king labuad cung keragulan.

acdj

\

Almario C. de Jesus-

Penata nacung Inda cu cang mal a Santo Antonio.

Anya istung sisimba cu macasulud mamilucu,

Caretang taung manakit, ing sabi da mag-pari cu,

Dapot anyang meragul na, aburi cu Abogadu;

Sasabian da detang Pari, manyabi la ping catutwan,

At den namang abogadu, ditac mu ing calaraman,

Neng metung cung Capampangan, tetac cu king caisipan,

Magaral cung mamalangcas, at lalang ping cawatasan;

Kening meging caranasan, maragul cu pasalamat,

Macasuyu king Amanu, gagambul a misnang tapat,

Agya mang mipalaut cu, sumangid dagat linipat,

Ing tibuan cung kebaitan, kening pusu macalapat.

Pangadi cu king Miglalang, midinan sang catuparan,

Anguanan na ining bie cu, king labuad cung keragulan.

acdj