Qng Mutya Ning Aslagan
Sinulat neng Juez Zoilo Hilario
San Fernando, Capampangan
(Capampangan Language)
Baluan cung maragul at alang catimbang
Ing casaquitan mung quecang tatangisan,
inya, Balayan cu, ba'ra cang ilimbang
bisa cu pang dalit agya mu mang misan.
Qng amanung cacu pigtumaila ra
Ing queca lugud cu lugud buri cung ipinta;
Queca yang pusu cu, queca ya ing lira,
Caladua queca ya, queca ining sinta.
Ing tronu mu simsam de man ding Palalu
pulisan me na yang lua mung masalusu,
atin ca pang Tronu qng busal cung salu
bucud me, Indu cu: "Ya cabud ing pusu."
Itan mung sambitan, payuan yaning dusa;
Qng justisia ning Dios carin ca manaya,
Ating capupusan ing sablaang parusa
Caibat ning dalumdum 'ting lunto alaya.
Quetang rebolusion balu mung linamac
qng pamagsarili ing dayang dinanac.
ding anti ngan queca, calma ra man jamac
labuad lang matapang, e lajing patianac.
Nung napun qng sican dang lusuc ding tacde
ing catimauan mu icua mung agale,
ing qng bie sarili bayung pangapacde
qng sican ning isip ngeni mu pamale!
Caring quecang anac a peparangalan
beit at linangap qng candungan mung nuan,
ing queca e lugud bague yang quintalan
qng lagiu nang Judas qng libutad canuan.
Ba' cang luguran pa canacu la dapat
aduang pusung queca qng lugud miyulat!
Bayu cu calinguan quing versung talapat
paclian cu ne pa mu ing cacung paniulat.
Busal ning pusu cung nung nu e pipagiu
ing queca pacamal a quening lub tintu,
Indung Filipinas, tatac da ca lagiu
e qng letrang uling: Caring Letrang Guintu.
Republicang maslag, mabandi't timaua
a taguri na sa queca ning dila.
Bayu cu sa mate ticdo cang timaua
aqua que pang uman ing quecang Bandila!
Buri mu neng bation o caya silipan
ing Aldo panayan ba 'mu nong timanan?
Mequeni, muquiat ca. Indu cung alipan
babo ring pago cu ba 'ra cang pusanan!
~Juez Zoilo Hilario
c. 1922