Indu Cung Balayan
Indu Cung Balayan
Neng Renato B. Alzadon
Indu cung Balayan,
nanu tang buri mung gawan cu mo sana
king ban milunasan
ing casakitan mu at pamibabata?
Buri meng gamitan
ing cacung panyulat? Balen co kecaya....!
Ing cacu keca ngan,
uling anac mu cu, at balayan daca,
Buri meng culayan
ing papil dang pusu ding anac mung sinta?
keca nang gisanan
malutu cung daya, yang gawan mung tinta;
O' balu mu naman
ibat king anac cu nung atin cung pita
ing cacung tangalan
ing panga-angu mu king saug ning dusa.
Indu cung Balayan,
atatandanan me ing anac mung bungsu
itang cayanacan
a kecang pibatang inanad at tiru?
Agyang canita man
inampang ne keca ing tintang malutu
busal ning caguluan
e micanlapan mang maniabi king tutu;
ngeni, ing tintang yan,
nung eya pa sapat, maniabi ca, Indu
nanung cacung daptan
ban miyaplacan sa ing lua mung tutulu;
king catajimican
pakiramdaman keng macabuclat pusu
ing kecang pagnasan
a caligayan mung keca cu asuyu....!
June 24, 2008