Anggang Camatayan
Jose M. Gallardo
Mandili, Candaba, Pampanga
Ining masaquit cu e sapat a bague
Ban ing Amanu cu paimburisan que,
Nung mauala ya man ining bugtung cung bie
Capatac ya ’ng danum ing anting meyacse
Ing meto-tapayan mimin ngang miyugse
Dapot in Amanu, nung iti yang mate,
At iting tapayan mimin ngang miyugse
A capisic mang danum ala na cang a 'que.
Inia mu 'man anti ining casaquitan
Ing cacung Amanu e que apabustan,
Nung ing pamaniulat ya ing maguing sangcan
Qng panga-lapit cu qng cacung cutcutan,
Casampat ning mate! Ticdo ya sa 't minuan
Ing cacung Amanu't Indung Capampangan,
Uling cabang ating lalto cauatasan
Agyang mate na cu... Mabibie cung miuman.
Inia... cabang ating dit'pang macatagan
Quening canacung bie, diua at sicanan,
Ya nang panata cu ing e que cauangan
Ing cacung Amanu't Indung Capampangan;
Potang mete na cu... mecad, canita man
Ali que pa mu rin maliaring calinguan;
Nung magul ing angin qng cacung cutcutan
Quetang caluscus na pabal cung cundiman.