ING APU NANG SIMANG LEYSON, ING GAROSA AT DAMULAG
Neng Simang Leyson, (Poetessa Macabebe)
Ing Garosa nang Apu cu, megawa ya ketang kuayan
Yti ala yang parugang, aneng cayan gugulyutan
Agyang mababa ya yti, agyu ne nitang Kalakian
A Damulag a sese na, madalas ming gagatasan.
E pu anting capangayan, manyaman ke pu Almusal
Gatas na nitang Damulag, titiltil mi ng Pandasal
Anya yta nang Pandasal, misna ya pu calinamnam
Nung malwat me pang isoso, bayu subu king acmulan.
Neng pakiskis ne mang pale, ketang Garosa isake
Agad na na cung sabianan,Inang tuki na ca dale
Mamirapal na cung gayac, ing garosa lundagan ke
O caya maki-angcas cu, keng siping na macalele.
Ing Balayan yang saria mi, medyu malaut yang bina
Anya dacal cu acakit, mengapagal la ding mata
Dacal la retang tindahan, aga-agape a bale
Aneng dagul ing pisamban, at malwat cung miglalawe.
Lalacad la ngan deng tau, keng dalan salasalabat
Pagmulalan da cu rugu, ketang cacung panga-atyat
Babu na nitang garosang menibatan king marangle
Gugulyutan ning Kalakian king Plaza macacalale.
Yti e cu acalingwan, parating lulub king isip
Inyang mabie ya'y Apu cu, at caya cu maca-kilic
Buri cu sana ping gawan, dapot e na abalic pa
Deng damulag at garosa, ala keti America.
2014-10-02 22:40