Rodolfo
Rodolfo
Neng Rodolfo Catacutan, Sr.
February 8, 2012
Abac a maranun, saslag ne ing aldu
Bulan ning Febrero, nineteen seventy-two
Biglang tinalacad, ini nang abe cu.
Tara dala mu cu, keta San Fernando.
Uling bulan na na, ning pamanganac na,
Agad tinalacad, memirapal linacad
At ena man meluat, mapilan mung dayas,
Metung yang lalaki, ing kecaming anac.
Mibait ya ing anac mi't inaus Rodolfo,
Ika walo ning Pebrero nineteen seventy-two.
Misuwerti cu namang milapit a obra,
Panti pandagul na asubaybayan cu.
Mabilis milabas ing dakal a banwa,
Mika pamilya ne at mikaanac pa.
At caibat ning apat a pulung banwa
Magpasalamat ya king kebaitan na.