Ing Bie
ING BIE
Neng Almario "amor" C. de Jesus
Iniang ica ing mibait, ing kiac mu asna na sican,
Ding macapadurut keca, matula la't timan timan;
Samasan mu sa ing bie mu, uling potang mate na ca
Deng taung macapadurut, yla ngening cumiac keca.
Uling ing bie na ning tau, anting luwang mebalbal perlas
O bulung na ning tanaman, mapapanat, malalagas;
Sasabian da mitacda na, nung capilan ca mibait,
Anti murin itang horas, potang inawa masaclit;
Anya tictac a ulaga, itang depat mu nung nanu
Pilatan ning panga-bait at itang tauling singap mu;
E mu cabud ing itsura, alben mu ing panugali,
Agyang dacal ing pibandian, ytang sabla lacwan mu ngan yti;
Nung lalun na ca ning tau, muli sana ketang timan,
Mipaid ngan itang lungcut, at damdam cang capaldanan;
Masakit pin ing mabibye, keti babu na ning yatu,
Uling e mu asiguru nung nanung maging Calma Mu;
Ytang sucat mung tandanan, at yang dapat mung gawan
Luguran me ing Miglalang, king pusu at caisipan.