Apalit Cang Rizal
neng Rodolfo J. Catacutan, Sr.
2/25/2012
Banwa atlung dalan migit bisabus deng alang sawa,
Detang tawung taksil menibat aliuang bansa.
Mibata yang casakitan, miculaput yang palyasa,
Tinangis yang misnang salpak, melungcut niyamung mistula.
Medacurak nang matulid buri namang ipamingwa
Alang tune acarapat e milaban tutung maina.
Minalangin ni 'ya king Diyos banwa niyamu tinalanga,
Caplas ning keya merapat inamyam nang mitmung tula.
Sinulat nang alang canglap Fili’t Noli MeTangere,
Lugud na king balen tamu Filipinas ning keyang bie.
Magcabyayan matimawa masampat ping tune-tune,
Abalu ra deting frailes carela yang pepapate.
Macalambitin pa jalus caring bulung ding tanaman,
Itang ambun a tinulu king mabilug a cabengyan.
Bayu sinlad ya y Febo caring bunduc ning aslagan,
Kanam nang tapat ning abac katlu nang pulu king bilang.
Ning Diciembre misnang dimla, dela re king Bagumbayan,
Macagapus lang gamat na tikpan de pa panimanman,
Berilan deng alang lunus ing catawan na mitimbwang.
Mebungsul ya y Felipa king mura nang camatayan.
Makanyan ing mepalyari ketang bie nang macalunus,
A depat da detang dayung sukab ampong alang tarus.
Pete re ing bayung Kristo itang Rizal a menatbus,
Pangasalwac ning daya na canitang gabun minagus.
Pamanakit na ning balen Rizal keyang camatayan,
Ing mua na sinalikbubu mepuput wari yang vulkan.
Tinipa ya y marting Diyos a menibat king catasan,
Sinaka la retang parkas dayat malat menibatan.
Migpaldas yang banwang matas siniklab ing camatayan,
Mibangun ya'y Bonifacio linto ya ing Katipunan.
King parang ning Balintawak kilisak dang agnan-agnan,
Inasiwas dong talibung bang mamingwang katuliran.
Ing depat nang Dr. Rizal e matatdang gintung aral,
Kekatang melakwan ngeni tukyan tamu at igalang.
Mabiasa tang misanmetung king uli ning katuliran,
Kamatayan e bala pin pibatan tang kasakitan.
Lugud ning balen Apalit kang Rizal tutung malalam,
Pepakit nang tapang at belwan e malyaring calingwan.
Pagmasusiyan ning buong bansa ing keyang kamatayan,
Balang atrenta na ning Diciembre e macacalingwan.
Ing milabas a istorya sukat tamung panikwanan,
Midamayan mikalugud lalam na ning katimawan.
Jose Rizal tike keni ring kapatad mung melakwan,
Pagintuan mi ing depat mung mapuri’t kabayanihan.