ING CANACUNG MAESTRU
Neng Almario "amor" C. de Jesus, P.L.
Ing Agila Ning Apalit
Careng anggang meging maestru, buri cung tinuru cacu,
Obat aliwa cang dili, talagang ipagmaragul cu,
Itas daca qng calucan, cayantabe ytang tronu,
At agyang nu cu mipadpad, no mang suluc na ning yatu,
Detang tirung cawatasan, mantabe la kening bye cu.
Ytang lugud qng Amanu, amanung beitan tamu,
Menakit yang bale tune, sesesen meng misnang yubu,
Metung cang asyas a narra, qng tibe alang capara,
Bagyo't uran o sigwada, alang tacut mamarap ca,
Uling anti ping poeta, babye na ngan cagiwan na.
Inya yca O Poeta, ining kecang discipulu,
Mebiasa yang gawang bersu, rima at sucad a ustu,
Megpilit neng mangamanu, ing lira gewa ne tonu,
Maki abe yang sumuyu, tucyan na ing delanan mu.
Ytang Amanu tang Siswan, luguran ya ping mayubu.,
Oyan ngeni mayayakit, bunga na ning capagalan,
Meg umpisa neng mamunga, detang tanaman mung tenam,
Disipulung kecang tirwan, mebiasa neng mangundiman
Ila ngening ring isalbag na, sesen nala at gambulan,
Anting bayad king pagal mu, pacyapusan na ca dalan.
Manintun yang cayanacan, ba nang abie ing balu na,
Balang dacal ding sundalus, sumuyu king Amanu ta,
Uling ngeni ing panaun, at cailangan masagip ya,
Ing Amanung Capampangan, singap singap ing cawe na,
Cailangan ne ing timbulan, ba yang miras king canatba.
Pupugayan da ca Maestru, canyang banal mung parasan,
Ing lugud mu king Amanu, e cucupas capilan man,
Eca sa tucnang gugulis at lalalang cawatasan,
Ila reti ding Pamana, a lacwan mung cayamanan,
King Amanu tamung Siswan, caring maldang cayanacan.
Poeta Lauredu ca pin, ning amanung Capampangan,
Meging "MOKA" ketang Arte, dapot ala cang degulan,
Angga ngeni ing panandam, ding MASA ing luluguran,
At detang tala pagobra, Ortelano ketang linang,
Ica mu rin ing Capatad, e gumulut capilan man.
edited: 12/30/11,