Acalingwan? Ali Da Ca!
ACALINGWAN . . .?, ALI DA CA. . . !
(adult version)
neng Almario "amor" C. de Jesus
Ot e ra ca acalingwan agyang nanung cacung gawan
Ati ca kening pusu cu laman na ning caisipan,
Paintunan co reng pinandit pisulung misna canyaman
Angga ngeni macatatac e mabura capilan man.
Istung benging capitangan alus e cu mipatudtud
Anti da cang cacapcapan kening siping cu matudtud
Micacaul catang adwa at maninap alang paclud
Pali, galo ning catawan panga rimla mecu cabud.
Itang uma mung masapsap manyaman cung alalasa
Babie catug king pusu cu sasalicsic king caladua
Ing aplus ding kecang palad mitatas cu ketang glorya
Anting Bulcan a mamacbung, papalwal na itang lava.
Caras na ning galing aldo damdaman cu ing bulung mu
Manene miraras cacu anting duldul neng caleldu
Mipacde cung timan timan caburi cu keng sitsit mu
Caibat mapilan a horas migpainawang pasibayu.
Lugud at tulang binie mu sasagid banwang catasan
Dadaluduc ketang dagat pecamalalam singaban
Mig panyud cu ketang agus inyang misan mu cu licwan
Inya rugung menakit cang sinta aliwang candungan.
Dapot agyang mipacanyan ining calmang meging bili
Ing panlalawe cu keca e kinupas e melawi
Obat caya kening pusu, ica cabut ing mitali
Agyang ala na ca cacu, ACALINGWAN DA CA? ALI !
Sept. 20. 2012