PUGE,
Paninap ning ninu mang talasulat o poeta, ing ding balang belangcas nang cawatasan adake nu caring sabla. Emu king pamaggale, nune ing deti milimbag la anting metung a "libru". Librung malyari nang lacwan anting bacas a mantabe caring tutuking Henerasyun o cayanacan a mica lub sumaup manintun ketang mebating a singsing ning culturang Capampangan.
Pupurian ke at pupugayan y poeta lauredu Arturo "Artdax" Tolentino keng tagumpe nang mecagawang masampat at masanting a libru ning cayang paninap. Binasa cung tunggal tunggal ding cayang cawatasan/poema pati na ding English Versions. Mayayakit king talustus ning isip na, ing pamanalacaran na king bye, itang cayang capanwalan, at cagiwan sumulat a babye aral, tula at pamanuru. Ayayanig mu nung macananu yang lulugud y ArtDax, uling y Art poeta ne ning Sinta at Lugud.
Careng cayanacan, a maki-lub manigaral at bisang mabiasang mamicudta king Amanung Siswan, deng poema nang ArtDax carapatdapat lang basan at gawan anti mung padrun o modelu. Simpli la estilu, ating bayu at lumang amanu, at e la macasawang babasan at didinan dacang aral ketang maluca dang cabaldugan.
Ing Parnasong Capampangan, mipala ua uling ating talasulat at poetang calupa nang Arturo Tolentino, a alang sawang lulugud at magmalasakit king Amanu tang Siswan.
Luid ca Arturo "artdax" Tolentino
Almario"amor" C. de Jesus, Poeta Lauredu
Ing Agila Ning Apalit,
Colegyu ding Poeta Lauredu, Parnasong Kapampangan
Academya ning Amanung Siswan Internaciounal
Poeta Medalyadu, United Poet laureate International
Integrated Bar of the Philippines
Rotary Club of Southern Pampanga
United Pampanga Leaders Council, USA
Apaliteneos of Southern California USA
Camalig Capampangan
Kapampangan Pride
Proud to be Capampangan,
TnG - Talasuyu Ning Ginu.
******************
O Art Dax a Poeta
neng Almario "Amor" C. de Jesus
Canitang itang idad cu, calupa na niyang keca,
Macabural cu pa salu, at masyas ing talacad ta,
At deng poesyang ibubugnus ta, king sintang alang capara,
E la lima detang Diosa, melasing king candungan ta.
At neng dudungdungan cu la, deng poesya mu O Poeta,
Macayama lang pilasan, deng amanu mu keng sinta,
At saca cu timan timan, babalicdan ing delanan,
Anti mu acu y Art Dax, poeta ning Capalsintan.
Talaga yatang macanyan, ing mabibye king sicluban,
Ing ngeni meging bucas ya, ing bucas maging napun ya,
At ing sabla anting agus, nucarin ing caulyan na,
Menenaya ya ing dagat, maging tawling tucnangan na.
Anya ica o Poeta, keng idad mung casibulan,
Samasan mu sanang itanam, detang amanu tang siswan.
amor (soneto)
See a revised version in O Art, A Poeta.