Ardin Ding Sampaga

ARDIN DING SAMPAGA

Neng Almario "amor" C. de Jesus

Neng lulub ca ketang Ardin, dacal la retang Sampaga,

Anya naman ing madalas, maging salawahan mata,

E mu balu istung misan, sanu ing kecang pilinan,

Agtalan me ketang tangke, caring labi mu panuman.

Macanyan la reng poeta, lalawe lang tune legwan,

Uling itang inspirasyun, cailangan ning caisipan,

Detang sampagang mabanglu, macabye lang capasnawan,

Gad cang macalalang poesya, king dalaga kecang yampang.

Neng lalun ke ing litratu, larawan na nitang legwan,

Meging anac ya ing puso, meging mayumu cu timan,

Panayan cu ing pinandit ing ackit da ca sang misan,

King Ardin da reng dalaga, tutu racang pangawilian.

Anya sana cacung mutya, damdaman me at tingiran

Ining malucang poeta, alipan ning mal mung legwan.

Artesia, CA USA Oct. 17, 2012

Almario C. de Jesus *****

Ardin na ning Balen

nang Simang Leyson

Mibait at meragul cu, king balen ning Macabebe,

Busal da retang tanaman, at libutad ning Marangle,

Migsicap la reng matua cu, telacad de itang Bale,

Anti ya waring palasyu, masaya caming Mabibye.

Dacal la reng mamanican, mag-harana neng Cabengian,

At matula cung mamarap, macuswelung Makirandam,

Anti cu waring sampaga, a buri dang Pisamsaman,

Mengaring malamarine, asna selan nung Tagilan.

Balen na ning Macabebe, ating ardin ding Sampaga,

at miyaliwang tanaman, akit mu king paligid na,

Ating Rosal, Sampaguita, macayama ing banglu da,

Anya dacal lang bubuyug, limpad limpad la carela.

Anya pecaingatan mi, e masira ytang Puri,

Ing nectar na ning dalaga, pacaingatan yang Dili.

acdj. 1/23/2017