Istoria De Un Amor (Pamanlala)

ISTORYA DE UN AMOR (PAMANLALA)

Neng Almario "amor" C. de Jesus, P.L.

Nung atatandanan mu pa, mag-babaintau cata,

Deng dalaga ketang baryu, maglame la pang lalala,

Lalam bale ating papag, masaya lang abe abe,

Cabang itang baintau, ligid ligid lele lele.

Macanyan tang mamag lolo, paralan ta na keng lawe.

Sangcan ta mung papaturu, pabulung bulung manene,

Anya naman ditac ditac, mebiasa cung diga diga

Calabas ning paru-minggu, tinangu ne ing dalaga,

E mu itang pamanlala ing abulu cu canita.

Itang pihican cung pusu, migising ya at milsinta,

Ing Istorya de un Amor, nitang cacung cayanacan

Angga ngeni timan timan, potang cacung babalicdan.

Inyang misan minuli cu, migpasyal cu king baryu mi,

Ala nang lalalang cupya, at maglame istung bengi,

Deng bayung tubung dalaga, alus memandaywan na la,

Pamanlalang keragulan, licwan da na at ala na.

&**********&

BIE NING POETA,

Neng Almario "amor" C. de Jesus-

Madalas ing malilyari, keng bili mung misnang datun,

datang cabud ing pinandit, midinan cang inspirasyun,

deng amanung lipo-lipo, lalapit lang susun-susun,

canita ca macalalang, cawatasan a manayun.

At ing metung a poeta, alipan ne ning Romansa,

Mabibye ya't mangisnawa, king lagyu ning Pamalsinta,

Agyang nanu pang pabsubuc, talacad at labanan na,

Arapan at tanggapan na, ytang calma'ng mibye caya.

Deng amanung susulat cu, malwat na lang macasimpan,

migulis la at milulan, king caban ning caisipan,

keng lacad na ning panaun, dacal nacu rin delanan,

minye aral at tuntunan, cambe casalpantayanan.

Ing mabibye keting Yatu, anting mipayid a banglu,

caibat nang sinalingalngal, ala na cang ababau.

acdj - sept 30th