Noel Cang Ninong Ruding
neng Rodolfo J. Catacutan, Sr.
3/1/2012
Karing pangunakan a minie dangalan,
Anak nang Ate Glo, tutung caluguran.
Lalam casakitan, y Noel megaral,
Meyari PMA metung neng opisyal.
Y ate cung Gloria, meyari yang maestra,
Keng pamakiasawa, talagang tinud ya,
Ding limang anac da, apagaral dala,
A pagmaragul na, ning kekeng pamilya.
Ita nang pangane meging inhinyeru,
pangadwang lalaki, militar liban na,
Ita namang nurse Army Colonel ya pa
detang pecawali Maestra at CPA.
Adwang pulung banwa, mecapibalic cu,
Anting balic-balen, para magbisita,
ing PMA graduate, ngeni Heneral ne,
Mica pamilya ne, ding tau lalun de.
Bista man masaya, kekeng pamiikit,
Malungcut pa murin, ate Glo ala ne,
E na rugu ikit, disnan ding anac na,
metung a Heneral, dangal ning pamilya.
Nung mabie ca Ate, at atangalan mu,
Ding anac mung licwan, migsicap lang ustu,
Mantabe ca sana, yang panalangin cu,
King pamicalugud, carela tiru mu.