Pamanigaral nang Almario C. de Jesus — TnG
Past Worthy Advocate, Knights of Columbus , District 7749
(Inactive status)
Keng metung a cristianong kikilala keng cayang Iglesia at ating casalpantayan keng Miglalang caya, tutung maragul a bage at macapasnu pilubluban at caisipan ing mabiasa yang dudungdung Biblia anting pamamintu keng sasabian nang Jesucristo, "nung buri yung abalu nung ninu Acu, salicsican ye ing scriptura tungcul canacu". Macanyan cung menalupsupan at memasang anting pangadi bang king dimut cung cagiwan ipalino na cacu ning Espiritu Santo nung nanu ya ing Amanu at ing cayang Mayap a Balita. Keng kelwatan ning pamanalicsic cu, asulat keng anting "commentaryo" king amanung English ing metung a articulo a mica titulung, " The Deity of Christ, the Humanity of Jesus." At ngeni, inisip cung mamalangcas metung pang commentaryo king amanu cung beitan, ing amanung Capampangan, bacu lang adake king dimut cung belwan deng calupa cung Capampangan a manigaral mamasa keng Banal a Casulatan. Anya mibait ya ining "ING DIOS METUNG YA" mu. Nung atin mang pansariling commenteryo, deti e la mangabaldugang pamag-bayu o caragdagan ning macasulat keng Biblia o doctrina mapalyaring macalisya keng tuturu na ning Iglesiang Cristiano O Catolico,(iti e pu seria) nune nasa cu mung apalino masalese ing pamanatindi cu careng versiculos; ing maulaga murin itang mismung lintad/pepakit ning Biblia, yang ganap a panwalan, tandanan at tukian. E ke ikit y Jesucristo calupa nang Tomas a micacunu canita, dapot manwala cu cang Jesuscristo, "uling Nuan la retang bista man e ra cu ikit dapot maniwala la".
Ing ninu mang tau a malugud king Dios, balu na ne ing Dios. Balu tamu king ding diosdiosan king camatutwanan mistula lang ala, at balu tamu naman king alang aliwang Dios bucud mu king metung a tune Dios, ( 1Cor. 8:4.b). At agia mang atin lang sasabian a dioses king banwa o keti king yatu - atin pang dacal a ausan dang "ding dioses" o "ding ginu", macanian man para kecatamu, atin metung mung DIOS, ing Ibpa a penibatan ning sablang bage at mabibie tamu para caya. Metung ya mu ing Ginu, i Jesucristo, king capamilatan na melalang ing sablang bage at king capamilatan na naman mabibie tamu, (1 Cor. 8: 5, 6).
Deut. 8: 6:4, MAKIRANDAM CA ISRAEL : Iti metung yang pamamasiag monoteisticong casalpantayanan, " King Ing Dios, Metung Ya Mu, ala nang aliwa subali caya. Iting versiculo ya ing megamit bandang tauli antimong pamuclat a amanu ning SHEMA, metung a panalangin a binang maulaga angga na ngeni king casalucuyan king debocion ding Judiyos. antimurin ing monoteismong alang pasubali nganang sasabi, "ing Ginung Mayupaiang tutu, Ari na ning Israel at keang talapangabus... "Acu ing mumunang dili at tauling dili", Alang aliwang Dios subali canacu". Acu ing Ginu, alang cayarle, alang aliwang Dios subali canacu, (Isa. 45:5a). Bang keta ibat king aslagan angga king albugan, ding tau akilala ra king subali canacu ala nang aliwa, (Isa. 45:6); at ngana magsalita cayu, ninu ing miglantad caniti at migsalitang macapauna tungcul caniti canita pang milabas a panaun? Aliwa wari Acu, ing Ginu? Subali canacu ala nang aliwa pang Dios; ala nang aliwa pang Dios a macatuliran at tagapagligtas, ala na ping aliwa subali canacu, (Isa. 45:22). Maula ca at darapat macapagmulala uling bucud mung Ica ing Dios, (Psa. 86:10).
Ibpa, Anac at Espiritu. Ing Dios magsalita ya namang Acu (i) at Itamu (us)
Canita cu dimdam ing Ginu, nganang sinabi, "Ninu caya ing itubud cu? Ninu caya ing magdala king amanung ipayabut tamu? (Isa. 6:8); Sinabi na ning Dios, "Gawan taya (Migit metung/plural ya) ing tau, calarawan Tamu (us), agpang king kecatamung (ours) wangis (singular/one) (Gen. 1:26a), "Lawan yu! ing tau meging anti ya mung metung kecatamu (like us) cambe ning belwan na king mayap at maroc (Gen.3:22), Tara, tipa tamu (plural) at caring piyayaliwa tamu (plural) ing carelang langguahe, canita e no maliaring micacaintindi; (Gen. 11:7).
Ing patungcul a bage, king Ibpa, Anac at Espiritu—Nganang Mateo 28:19, "Munta cayu, ulinita caring sablang bansa, at gawan yu lang alagad cu. Biniagan yu la king lagiu ning Ibpa, at ning Anac at ning Espiritu Santo ". Iti mecad ing peca malino diling pangapasiag na king bayung tipan ning capanwalan a ating Atlung Personas king Metung a Dios, (Holy Trinity One God). Marahil ya ing formulariong biniag a magagamit king communidad nang Mateo, dapot mumunang dili ipawaga na ing bubunga ning Biniag; ing pangayagum ning mebiniag king Ibpa, Anac at Espiritu Santo .
Ing Ibpa, Anac at Espiritu, atin na lang pamiyabe-abe bayu pa ing camumulan at angga king alang angga. At ing Ibpa, Anac at Espiritu, atilu ngan king cametungan ning metung a Dios:
1. ING IBPA DIOS YA
Ing Dios cusa neng lub pinili/pepasubali ing Iglesia, birian na ing pangatatag na, pibawalan ne king capamilatan ning Espiritu Santo , at inatbus ne king capamilatan ning Daya nang Jesucristo. Ing micacametung dang kimut ding Atlung Personas ding Dios, mipatibayan king cabilugan a casulatan. King aliwang pangasabi, mipaganaca king ing Iglesia, king ing Dios da ring Cristianos, migit yang e palac caring dioses da ring Paganos. Ing Dios ya ing mimingat carela; itatangi nala; ipalalu na la; at ucuman na la. Ing Dios kikimut ya king yatu capamilatan ning upaya ning keang Espiritu ban maglalang bayung Israel macayagum cang Cristo, (cf. Rom. 8:11; 1 Ptr. 1:2a)
At adwan cu king Ibpang maligaya, Dios ning Ginu tang Jesucristo, king pagcalub ne sa kecayu ing Espiritung babie cabiasnan at pamanalinting king lalantad ning Dios ba yu cung lubus akilala, (1:17a) at atalastas dang tune nung ninu i Cristo. Ya ing uliran at parasan ning bie.
2. AT ING ANAC, DIOS YA
Heb. 1:8: Dapot tungcul keang Anac, nganang sinabi: " Ing trono mu O Dios, lambayan ya capilan man, at ing Centro ning keang Cayarian, Centro ne ning Catuliran".
a) Ing Anac ya pin ing cacatawanan ning cabiasnan ning Matuang Tipan anting caningningan ning ligaya ning Dios at ganap nang larawan ning keang Cadiosan, (cf Cab. 7:26), King evangelyo agpang cang Juan, "Ing Amanu, ya ing cacatawan cang Jesus mismu; King i Juan ing Mayap a Balitang mipanaral ya pin ing Amanu ning Dios; iting Himno pangliturhia buri nang itilmid ing masagid at divinong caugnaian ning Anac king Dios Ibpa, pati na ing panga-atiu na na bayu pa melalang ing sabla; at ing gagampanan na busal ning pamaglalang. Iting cametungan ya ing babie dalan para idikil la cang Cristo ring amanung "Amanu" at "Cabiasnan" ning Dios.
b) Canitang camumulan, atiu ne ing Amanu: Ing Amanu (logos keng Griego; Verbum keng Latin; ) sasampulungan nang anting metung ing Amanu nang mabie at macapaliari/miglalang ning Dios, ing cabiasnan a catutuan a babie personalidad a mabie a cacasangcapanan ning Dios king keang pamanalastas king tune at tutu, (filisofia greca).
Juan 1:11 - Canitang camumulan, atiu ne ing Amanu; ing Amanu cagum ne ing Dios, at nung nanu ya ing Dios, macanyan ya ing Amanu, (v2); Ibat pa king camumulan ing Amanu cayagum na ne ing Dios, (v.3), King capamilatan ning Amanu lelangan ning Dios ing sablang bage; nanu man ing melalang alang mepaliari nune mu king capamilatan Na.
NANU YA....MACANYAN YA
I Jesus Dios ya ping tutu. Lawan ye ing camalinawan ning Roma 9:5. Nanu pata, ing Prologo o Pamuclat a dalit ning Evangelio, migmula ya at mepupus ya (1:18) cambe ning matning pamipatutu king cadiosan nang Jesucristo, ing Amanung micatawan tau. At ing Cristo, king pangatau na, ibat ya caretang lahi; ing Cristo king sabla-sabla, "DIOS A SUCAT PURIAN CAPILAN PA MAN, (Rom. 9:5b).
Cabang panaian taya itang mapalad a aldo na datang yang mipnung caligayan, i Cristo Jesus a kecatamung Dios a maula at tagapagligtas, (Tito 2:13b); pastulan ye ing Iglesia ning Dios, a inatbus na capamilatan ning mismung daya (ning sariling anac) na, (Acts 20:28b; cf, 1 John 1:7) Dinatang ya ban patutu tungcul king sala ban keta king capamilatan na ning keang patutu, manwala la ding sabla.
GINU CU AT DIOS CU
ing sucdulan a pamihayag casalpantayanan (cf. camalinawan ning Jn 1:1) I Pedro, pecabalwan ya king keang malapuring pamamasiag casalpantayanan, “Icayu pu ing Cristo, ing Anac ning Dios a Mabie”. I Tomas e ya macalingwan pauli ning delanan nang pamagduda at pamicacunu bayu na icwang a pasiag ing keang casalpantayanan, :Ginu Cu at Dios Cu”. At I Jesus ngana caya, “ Manwala ca uling ikit mu cu. Nuan la retang bista man e ra cu ikit dapot maniwala la”, (u,29);
Ing Anac bista man atiu king pangaDios, e na inangcaminan ing keang pangapante king Dios. Petibayan na king I Jesus Dios yang tutu at tau yang tutu; king keang persona atiu ing tune pangtau at ing tune pangaDios (catauhan at Cadiosan). E ta ya lubus atalastas iting maragul a misteryong macalaganap caring casulatan, (cf. Mt. 27:4; Mc. 13:32; Lc. 2: 40-52; Jn 17:4; 2 cor. 8:9; Heb. 4:15; 5:7-8)
ING KEANG PANGAPANTE KING DIOS
Keni atin mipatanid king bayu ya pa micatawan tau, atiu ne i Cristo. Mipatanid la naman detang miyaliwang aske ning cadiosan a matula nang pisawili ban keta macasuyu ya king aske ning pangatau. Ding mapilan acakit de keni ing patunggit king istoria ning Genesis; E ne catulad Adan i Jesus "bista man.. . . atiu caya ing pangaDios" (Gen. 1:26-27) e na inangcaminan ing keang pangapante king Dios; catumbalas ne ing minunang Adan e bisang makipante king Dios (cf. Gen. 3:5-6).
ING ESPIRITU DIOS YA
I Pedro ngana caya, "Ananias, bakit papintulut mung liban na cang Satanas angga king aisip meng paglaraman ing Espiritu Santo ngening misicap cang ditac king alagang ayabli mu king gabun? Canitang e mu pisali ing gabun, ding cwaltang ayabli mu e wari keca la pa murin? Bakit icwa mu pang aisip daptan ing anti canian? Aliwa ring tau ding paglucwan mu, nune ing Dios" (Acts 5:3-4).
ING IBPA, ING ANAC, AT ING ESPIRITU, atlu la king alang angga (all being eternal)
2. Ing Anac (Being eternal) : At ilulun mu la anting metung a balabal at cawangis ning metung a imalan alilan na la. Dapot ica mismu, e ca bitasang maliwa, e ca tumwa at ala cang camatayan. (Heb 1:12 quoting Psa 102:27).
Alang mababanggit nung ninu i Tata na o Ima nang Malquisedec, at ala mu namang masasambitla nung ninu ring pipumpunan na, at alang mababanggit a pamagmula ning bie na o tungcul king camatayan na, "catulad ne ning Anac ning Dios, manatili yang pari capilan man. (Heb. 7:3).
ING ESPIRITU (being eternal)
Maigit e palac caniti ing apaliari na ning daya nang Cristo a midaun king sarili na, antimong alang dungis a sacrificio king Dios king capamilatan ning alang anggang Espiritu! Ing daya na macalinis caring pusu tamu't caisipan caring sablang dapat a alang bubunga nune camatayan, at papaliarian na ca tamung matampang macasuyu king Dios a Mabie! (Heb.9:14).
Ing Ibpa, ing Anac at ing Espiritu, mi-agum o atilu miagnan-agnan (simultaneosly). Adwan cu king Ibpa king pagcaluban na cayung metung pang Paraclito ban manatili ya cambe yu capilan man. Ing Espiritu ning catutwan a e maliaring tanggapan ning yatu anti na ning e na acakit, ni e ne balu. Dapot icayu balu ye, uling manatili ya cayabe yu at macasaut ya kecayu (Jr. 14:16-17a).
King caniwan at dapat, pecapalatandanan na ning Espiritu Santo ing catutwan ning Dios. Ding atlung personas ning Trinidad para para lang macataid king catutwan. Inggil King Ibpa, lawan ya ing Jn.4:23-24; Dal. 31:5; Is.65:16. Inggil king Anac, lawan ya ing J. 14:16. King yatu, Ing Cruz ya ing peca muhun a macapamilatan king yatu (detang e manakit cang Jesus manibat canita) at caring alagad (detang manakit caya); dapot ing Espiritu pin atiu "cayabe ra"; ding alagad nang Jesus at maiakit ya, "busal/cayagum da". Ating maniwala king iting tawling mebanggit a caugnayan (ing pamanucnangan) malino mapapaliari bayu miras ing Pamanipa ning Espiritu Santo king aldo ning Pentecostes (Dap.2; cf. Roma 8:9). Ing lugud cang Cristo at ing pamanupad caring keang cautusan e la maliaring picawanian, v.15. Luguran neng Ibpa cu. . . Acu Luguran kia naman. Ing luguran ning Ibpa e maliaring icawani king lugud ning Anac.
Iti pin ngana ing panalangin cu't panyiclaud arapan ning Ibpa, a panibatan ning sablang panga-Ibpa king balang familia carin banwa at keti king yatu: ipanigapu cu caya, king alang-alang king alang sucad nang calam a lub ning keang ligaya, pagcalub na kecayu king capamilatan ning keang Espiritu ing upayang mica sicanan cayu king bie yung Espiritual. Ban keta i Cristo mamale ya caring pusu yu king capamilatan ning casalpantayanan. Ipanalangin cu ing magyamut cayu't talacad matatag king lugud, (Eph.14:16-17a). Ing gracia ning Ginung Jesucristo, at ing lugud ning Dios, at ing pamicasi ning Espiritu Santo manatili kecayu ngan.(2 cor.13-13). Anya, ing capanualan at casalpantayanan e ya mawawala o mababating ing Ibpa a inalilan ne ning Anac, at caibat ning milabas ing Anac miyalilan ya king Espiritu. Ing capanualan, ding atlu: Ibpa, Anac at Espiritu, miagum lang agnan-agnan bayu pa ing camumulan.
Ing Ibpa, Ing Anac, at ing Espiritu, e la micacawani, ing Ibpa atiu king Anac at ing Anac atiu king Ibpa at ing Espiritu cayagum e ing lugud dang Adwa . a. iti e mangabaldugan king atin nang menakit king Ibpa. Itang menibat king Dios ya mu bucud ing menakit na king Ibpa (Jn.6:4);
b. Dinatang cu king lagyu ning Ibpa cu; dapot icayu e yu tinggap; dapot nung ating aliwang daratang kecayu king sarili nang lagyu, icayu tatanggapan ye, (Jn. 5:43);
c. "Filipe, calambat yu na cung cayabe" nganang Jesus caya, " angga ngeni e mu cu pa balu? Ing menakit na canacu, ikit na nia naman ing Ibpa, macananu mung asabi ngeni, "Pakit me kecami ing Ibpa?". E wari paniwalan king Acu ati cu king Ibpa at ing Ibpa atiu canacu? Ding amanung yayapse cu kecayu e cu yayapse ken mung sarili cung upaya: Ing Ibpa a mabibie cayagum cu, ya ing darapat caniti. (Jn. 14:9-10);
d. Misan pa titimid nang Jesus ing masagid nang caugnayan king Ibpa. I Jesus ya ing minatad king ganap a panga-pakilala ning Ibpa (1:18) inia pin ding alagad atin lang tune pangabalwan caya. Ing tuturu nang Jesus e menibatan king tau; Atin e macalag a pamibutnul ding keang amanu at keang dapat;
e. Potang datang ya ing Paraclito a itubud cu kecayu* ibat king Ibpa, ing Espiritu ning catutwan a menibatan king Ibpa, ya ing munie patutu tungcul canacu, (Jn. 15:). Ing Paraclito itubud ne ning Ibpa, king cayadwanan nang Jesus. Keni ing Espiritu daratang ya antimong mituburan ibat cang Jesus ampon king Ibpa; keni alang anggang pamanibatan ning Espiritu Santo king Ibpa ampon king Anac. Dapot ing Paraclito*, ing Espiritu Santo* a itubud ning Ibpa* king lagiu cu, ya ing mituturu king sabla kecayu at ya paganaca na kecayu ing sablang tiru cu kecayu*(Jn14:26); Ing Paraclito yang taga-pamatula; lawan ing camalinawan ning 14:16; ing Espiritu Santo ing caraniwan nang lagiu king Bayung Tipan (agia mang caniting evangelio, keni mu at king 1:33 magagamit)—pamansag yang mititimid king keang cabanalan, maigit king keang cayupayan o degulan/camalan, a itubud ning Ibpa—Ing Ibpa ampon ing Anac parehu lang mecatalamitam king pamitubud (cf.15:26). Ipaganaca cu kecayu—binang maulaga para king bie ning Santa Iglesia ing pangasulat na ning Bayung Tipan. (capayapan.Shalom).
g. Luke 4:1a: I Jesus migbalic ya ibat king ilug Jordan , kipwan ya king Espiritu Santo *. Tinaid ne ning Espiritu king Desierto, caring ticswan ne ning Diablo kilub na ning apat a pulung aldo. Bilang bunga na ning pamanipa ning Espiritu cang Jesus canitang mebiniag ya (3:21-22), ngeni, samal yang lulupig king Diablo. Nung macananung ing Espiritu prominente ya canitang macauna nang dangca ning ministerio nang Jesus (1:14-18), macanian mu naman king pamagmula ning panaun ning Iglesia king Dapat 1:14; 2:14-17.
h. Mat. 3:16-17 : Cabud mebiniag ya I Jesus, sinaca ya ibat king danum, at mibuclat yang bigla ing banwa. Ikit ne ing Espiritu ning Dios* paibaba yang masalusu catulad ning metung a patipati at memandal ya tulid nang Jesus, (3:16). Ing metung a Siwala meramdam yang magsalita ibat banwa: "Iti ya ing Anac cung Pacamalan, a tutu cung catulan".(3:17). (Holy Trinity seen here/mayayakit ya ing Santisima Trinidad keni) ing Espirtu Santo digpa ya cang Jesus e para lupigan ing casalanan (uling i Jesus ala yang casalanan) nune para casangcapanan na king pamagobra na anting Mesiyas a Dios at Tau, (v.17). Iti yang Anac cung Pacamalan—king Marcos 1:11, cang Jesus ya magsalita ing Siwala. Keni (3:17) pakilala ne ning siwala ing Ibpa caring makiramdam. Ing Siwala ning Ibpa cacablas na ning Is.42:1; Dal.27; at Gen. 22.2. Anac ning Dios: deting sablang pamansag: Amanu, pinili o banal ning Dios, cordero ning Dios, Rabbi (maestru), Mesiyas, Anac ning Tau, Ari ning Israel, piyabe yabe nung Juan king pamipakilala na cang Jesus cating Capitulo ning kenang Evangelio.
i. Ing Dios (trinidad) e la micacawani, nung ing metung dapat/galo ya, ding adwa galo la naman. Nung ing metung maco ya, ding adwa maco o tuki la naman. Nung ing Anac datang ya, datang ya king lagyu na ning Ibpa; at king panyatang ning Anac, panyatang nya naman ning Ibpa. nung ipadala de ing Espiritu, mipapadala ya king lagyu ning Anac; ing panga punta na, panga punta uli ning Anac at panga punta namu naman ning Anac. Ding Atlu anting Metung la mu. E la maliaring picacawanian king alang angga o micacawani capilan man.
1, Isa 9:6: Maleparan at laganap ing keang pamag-ari, busal ning capayapan a alang capupusan, king trono nang Aring David at king keang cayarian. Patatagan ne at patibayan king pamanucum nang e mangabiran at king keang pangamacatuliran manibat king casalucuyan angga na capilan pa man; ing masigasig nang lugud ning Ginung Mayupaya tutu daptan na at daptan na iti!
9.5—Macapagmulala. . . . Capayapan. . . metung a profoticong lagiung pansarili, cf. Cam . ning 1:26+, atilu king Anac king alang casimparang paralan detang catangian da ring micacaragul a personahe ning keang lahi; ing cabiasnan nang Solomon, ing tepangan nang David, ding cabanalan nang Moises at ding Patriarcas. Ing tradicion at Liturhia cristiano dirikil da retang pamansag. cang Cristo, pakilala rang ya ing tune EMMANUEL, Dios a macasaut busal ta mu.
John 14:7-11—"Nung Acu akilala yu cu, akilala ya naman i Ibpa cu", manibat ngeni cakilala yu ne pin at ikit yu ne" (v11); Sucat cayung maniwala cacu neng sasabian cung Acu ati cu king Ibpa at ing Ibpa atiu canacu, o caya manwala cayu caniti pauli ra mu man deting mala mismu.
John 10:30 — ACU AT ING IBPA METUNG CAMI MU
John 17:21 — Panalangin cu king ila ngan maging metung la mu, O Ibpa, "Ban keta , nun macananung Ica , Ibpa, ati ca Canacu. . . at Acu ati cu keca, ila man maging metung la mu kecata. Ding alagad ila ring peca nucleo ning bayung communidad/balen ning Dios. Mitutuburan la busal na ning Yatu, darala ra cambe ra ring mensahe ning catutwan at bie. Ding dacal sasalpantaya la cang Jesus king capamilatan ning patutu ra. Keni, ipanalangan nang Jesus king ding sabla maging metung la mu ngana wari—ding alagad at ding sablang sasalpantaya cang Jesus king uli ra. Ipanalangin na king miracayanan la sa king cametungan ning lugud a bubuclud capilan man ing Ibpa at king Anac. I Jesus sasabian na caring alagad, " king capamilatan ning pamicalugud yu carin na akilala ning ninu pa man king icayu alagad da cayu". Ing lantaran dang pamicacametung king lugud ya munie catibayan king Publico e mu inggil king carelang cametungan cambe ning Ibpa king patutung babie ning pamicalugud ding alagad acwa nang abalu ning yatu king i Jesus tubud ne ning Ibpa. Tanggapan ning yatu ing carelang sasabian king, "Ing Ibpa tinubud ne ing Anac antimong taga-pagligtas ning yatu" )Jn. 4:10);
Ing Anac anting tawling Adan, yang bie a babie espiritu (Life giving spirit);
1 Cor. 15:45b — Ing minunang tau, " I Adan, meging mabie yang lelangan" antimo ing sasabian ning casulatan; dapot ing tawling Adan meging Espiritu yang babie bie, Ing minunang Adan, ibat ya keti king labwad, uling melalang ya ibat alicabuc; ing cadwang Adan* menibat ya banwa.
John 14: 16-20 — "Adwan cu king Ibpa king pagcaluban na cayung metung pang paraclito ban manatili ya cambe yu capilan man". I Jesus, ya ing mumunang talapamatula (paraclito) lawan ye ing 1 Jn.2:1), a nun i Jesus mamatula ya antimong talapamilatan ding tau arapan ning Dios carin banwa. Ing Paraclito maliari ya namang abogado, talapamingwa, talapanasbuc, talapamilatan. Subali cang Jesus atin pang aliwang Paraclito" . Aliwa pang talausuc, o talasaup. Ing Paraclito cang Juan metung yang talaturu, talapatutu tungcul cang Jesus at metung yang talasugid (prosecutor) king yatu, at ya ing cacatawan king alang patnang pamanatili na keti king yatu ning Ginung Jesus a magbalic na king Ibpa;
v.21—"ninu man ing tatanggap caring cautusan cu at tutuparan na la, ita ing taung malugud canacu, luguran neng Ibpa cu, at Acu luguran kia naman at ilantad ke ing sarili cu caya".
Ing lugud cang Cristo at ing pamanupad caring keang cautusan e la malyaring picawanian, v15; luguran neng Ibpa cu, Acu luguran kia naman. . . . ing lugud ning Ibpa e maliaring icawani king lugud ning Anac.
1. 2 cor. 3:17-18 - "Ngeni, iting Ginu", a mababanggit caniting casulatan ya pin ing Espiritu*, at nung nu ya atiu ing Espiritu ning Ginu carin atiu ing catimawan, (v.18), at ita mu ngan ulinita, cacablas tamu anti caring lupa tamung alang tacap. Macanian tamung lalung maging cawangis na*, cabang mininingning ta nang mininingning king ligayang cacablas na kecatamu -- at iti dapat na ning Ginu a Espiritu pin.
Ing Ginu ya pin ing Espiritu — keni e ne picametung Pablo ing sinubling mebie Cristo King Espiritu Santo, nune ing amanua na, atin lang acaugnaian ing Espiritu nang Cristo ampon ing Espiritu Santo. Ngana wari, patutuan na king alang taung maliaring marap/lumapit king Ginu (maconverte king Ginu v.16) nung e ne pa ipakilala ing Ministeryo ning Espiritu Santo. Parehu lang macasaut o mandatila king talasalpantaya (Roma 8:9; Gal.2:20). King Roma 8:9-10, ing Espiritu ning Dios, ing Espiritu nang Cristo at i Cristo laltu lang micacametung o mililibayan a pangacabaldugan. King Dapat 16:6-7, ing Espiritu Santo ampon Espiritu nang Jesus lalto lang metung mu at parehu. Ing sangcan mecad uling ing Espiritu Santo menibatan ya king Ibpa at king Anac, at ding mumunang adwang personas ning Trinidad apapakirasan da ing carelang pararasan king capamilatan ning Espiritu Santo. Keni, ding bunga ning Espiritu ila pin: 1). ing catimawan (v.17;),, 2), Ding lupang alang tacap, (v.18) , 3). ing pami-cabayu rang aniu, (metamorphoo, king Griego), lalung meging cawangis. . . cabang mininingning nang mininingning, v.18).
a). 2 Cor. 13:13: Ing amanung TRINIDAD e ya mayayakit king casulatan, macanian man, manibat king camumulan, ing Cristianismo meging Trinitaryo ya. Maniwala ya panga-atlu ning Personas ning Metung a Dios. Iting doctrina papasiag na king ing Dios metung ya mu king panga-Dios, maki atlu yang personas: Ing Ibpa, ing Anac, at ing Espiritu Santo, ibat king alang angga. Ding Atlung Personas ning Trinidad atin la ngang para-para caring catangian ning caDiosan. Ing balang metung atin yang dake gagampanan. Ing Dios tinubud ne i Jesus, a Dios Anac, ing Dios Anac mete ya king Cruz king Calvario; Ing Dios Ibpa at ing Dios Anac, tinubud de ing Dios Espiritu Santo a babie tatac at macasaut king balang talasalpantaya. Ing caligtasan, dapat da ring atlung personas (cf. 2 Tes. 2:13-14; tito 3:4-6); Ding dacal a aliwa pang citas magsalita la inggil caring atlung personas king metung nang contexto. King panga-biniag nang Jesus, alimbawa, Ing Espiritu Santo pepakit ya king aniu ning metung a pati-pati, at ing siwala ning Ibpa merandam ya, (Mt. 3:16-17); King Mateo 28:19, i Jesus yuyutus na caring talasalpantaya ing pabiniag la king lagiu ning Ibpa at ning Anac at ning Espiritu Santo. Lauan la Efeso 4:4-6 mu naman...Roma 8:9; 1 Cor. 12:3-6; I Pedro 1:2; Judas 20: 21; Rev. 1:4-5 (This is a matter of Revelation experience, not doctrine). Base keng cametungan na at ing pami-aliwa king Divino Trinidad, (the basis of the oneness and of the distinctions in the Divine Trinity).
Ing Dios metung ya mu, at ing base ning cametungan na, ing cayang Divinong Pangsarili. (God is one by virtue of the one Divine Essence in the Godhead, (Gk ousia, Lat. essentia or substancia);
"The Divine essence is not divided or divisible, nor is it distributed among each of the Three; "Ing Divinung "essence" e ya cawa cawani at eya pipitnan-pitnan keng balang metung careng Atlu"; "Rather the Divine Essence is held in its entirety by each of the Three, so that it can be said that each of the Three is the "Complete God"; Just as the Father, the Son and the Spirit are not "parts" of God; so it is that they do not possess a portion of the Divine Essence, (John 16:13-15; Col 2:9);
Potang datang ne ing Espiritu ning Catutwan, saupan na cayung miras king cabilugan a catutwan. E ya magsalita king sarili na mung caburian, nune sabian na ita mung keang dimdam, at magsalita ya kecayu tungcul caring bage a paintungul;
v.15—ING SABLANG ATIU KING IBPA CANACU; inia pin sinabi cu kecayu: ing sablang sabian na menibatan king Canacu;
I Jesus ing cacatawan king catutwan (Jn 14:6), ya ing tinuru king dalan ning catutwan caring alagad. Ing Espiritu, ala yang pakilalang "Catutwan" a lalagpas ketang cang Jesus (Ef. 4:21), bagcus antabayanan nong sumulung pa king dalan at isundu nang lalantad iting catutwan. I Jesus, e mu misan, nune parati nang sinabi king e ya magsalita o darapat king sarili nang caburian; ding amanu na ila retang binie na caya ning Ibpa, (Jn 5: 19-30); anti murin, ing Espiritu e ya magsalita king sarili nang cusa. Ala yang daralan a pawaga nun e mu itang pawagang macasimpan king Amanung Micatawan tau. Ing bucud mung gampanan na, ya pin ing ipasiag na at ilantad king masala ing pawagang ita. Ituru na caring alagad ing sabla-sabla (Jn. 14:26); minie yang patutu tungcul cang Cristo (Jn. 15:26) at antabayanan na la't alalayanan ding alagad king dalan ning catutwan (Jn 16:13); ing sucdulan a “mission” na, ya pin ing panga-paligaian nang Jesus. Magsalita ya tungcul caring bage paintungul; e inggil caring profeciyas tungcul king paintungul, nune pamipalino king bage mepaliari na o mesabi na.
John 4:24 — "Ing Dios Espiritu ya, at ding sasamba caya sucat lang samba caya king espiritu at catutwan" Iti aliwa itang capaniamban a manibatan king lub ning tau o macasiduan king keang diwa. Ing Espiritu, ya pin itang Espiritung babie ning Dios at pakilala king catutwan a macapaliari king pamaniamba nang carampatan ning tau king Dios (14:16-17); cf "mibait king Danum at espiritu" (3:5);
1 John 4:8-16 — "Ninu man ing e lulugud e ne balu ing Dios, uling ing Dios lugud ya". Ing lugud macasalale ya king Cadiosan ning Dios. Detang mengabait king Dios sucat dang tularan ing keang Cadiosan. Ing Dios ya ing panibatan (v.9) at ya mu rin ing alimbawa (v.11) ning lugud ning talasalpantaya. Antimurin, ing lugud king parang tau, dake neng tune ning caugnayan ning tau king Dios (v.12); cabang "ala la pa pin menakit na king Dios", (cf Jn 1:18); Ing lugud ning Dios mayayakit masala king dapat nang Cristo (v.9) at king lugud ning talasalpantaya para caring aliwa (king para nang tau), v.12); Nung ing Dios mabibie ya king Cristiano, deting Waga o palatandanan pakit da ing tune cabilian espiritual: Muna, "King uli ning Espiritu, (v.13), inia ababalu tamu king "mabibie ya/manatili ya kecatamu". Cadwa, ing calaraman na ning patutu na ya pin, king ing Dios tinubud ne ing keang Anac maging Tagapagligtas ning ketawan (yatu). Ing depat nang capamayaran o pamanatbus Cristo para king caligtasan ne ning cabilugan a yatu, macanian man e ring sabla miligtas la. Caministilan ing ipasiag/kilalanan king I Jesus ya ing Anac ning Dios (w 14-15); Nung buri nang dalanan o camtan ning ninu ing caligtasan a ita. Catlu, ing lugud nang mandatila ning Dios, ya ing babie catibayan a lub king mandatila nang pamacisaut at iti lalaco na kecatamu ing tacut king pamanucum ning Dios (w.16-18); catatawlian, ing lugud para king Dios mipatuyag king capamilatan ning lugud caring parang tau (v.20;); ing lugud cristiano e ya metung a base lipolipo king caisipan, nune tune yang magaganap king masalang paralan king pamicalugud king metung at metung o pamicalugud king parang tau.
"Iti yang dimdam mi cang Jesuscristo, at iti ya ing amanung ipanaral mi kecayu: "Ing Dios sala ya; anya alang bitasang caralumduman". Sala o Sulu yang talastasan anti mong "catutwan at capayapan"; caralumduman ngana wari, "camalian o dewacan", lalacad ing dalumdum o king sala, mangabaldugan yang mabibie king camalian o mabibie king catutwan, e mu king isip nune pati na king dapat, ing pamica-agum king Dios at king metung at metung, atiu king pamibiebie agpang king catutwan at atiu king Dios at cang Cristo. Ing Dios Sulu ya (v.5); at i Jesus ya ing Sulu ning yatu (Jm 8:12; 9:5);
Uling ding Atlu king Divinung Trinidad mi-agum agum la, ing egana-ganang sangcap/essence at cayabe ing Divinung naturaleza/nature, mayayakit caring balang metung ning Divinung Trinidad. Nung delanan/experience, ninu man careng metung a delanan tamu itang egana-ganang Divinu naturaleza/Devine Nature king panga buo na (completeness) a mapalyaring e ngan ketang anggang egana-gana (totality) na. Anya, ing Dios atlu ya, at ing base ning panga atlu ya pin ing Divinung "Hypostases/peronae". (In substance three, in essence all are one).
ING DIOS A TRINIDAD, ketang cayang cailangan — "Essential at economiang/economical aspectu; Metung ya ing Dios, at Trinidad ya; pero Adwa lang bage king panga Atlu na. Ing pamangailangan/essential a bage king keang panga Trinidad, itang king panga Dios a pansarili; ita na mang "economical' a bage, aspectu na ning Trinidad macapatungcul ya caretang galo na at dapat.
Nung king "essence" na, ding Atlu metung la; nung king "economy" ding Atlu atlu la. Ing Ibpa yang pegumpisan/menimuna; ing Anac yang gagawa/accompishes; at ing Espiritu gagawan na itang buri ning Ibpa at agawa na na ning Anac.
Nung nanu ya ketang cayang "economical" aspectu, maca base ya ketang nung nanu ya ketang cayang "essential" a aspectu/bage, mayayakit ketang "economical" nang aspectu/bage.
At nung Ya, "essentially" Trinidad/Atlu ya mu, mabie/mayayakit ya mu king sarili Na at ala yang dalan a galo ba nung ayabut ing tau. Malyari ta ya mung pagaralan at e ta daralanan/experience, at mipamatulan Ya.
At anti mung "Economically Triune", gagalon na ing panga "economy" na ba yang maging tau, mabibie anting tau mu naman, mate, subling mie ibat king camatayan at maging bie a mamie espiritu a mipunta kecatamu cambe ning panga-Triune Dios Na.
Uli ning Iya, "economically triune" Ya, malyari tamung maging anti mo Ya keng bie naturaleza "nature" at pamilantad "expression". at uling Iya, "essentially Triune" Ya nung nanu ya king sarili na, maca-aliwa ketang kimut/dapat, manatili capilan man. E tamu malyaring magawang Dios ketang cayang alang anggang Cadiosan (Godhead).
Pamag lisya ketang "Scriptural "Revelation/pangaladlad ning Dios (triune)— Nung macananung ing delanan/experience ning Triune Dios megumpisang palabug ketang minunang Iglesia, macanian mu naman ing dapat a pamanatindi/pamipalino ning catutwan king Triune a Dios.
Tinubu at meracal ing salungatan at ing miyaliwang tuturu pinwalan da reng parti-parti (segments) ning Iglesya at micacawani la ding sasalpantaya. Ing milyari, deng turu/teachings meging herehe/ heresies la. Anya anting "reaction", ing matwang Iglesya mitatag yang "councils" at ginawa yang "Credo/Creeds: bang salese ing pamipalino at belwan keng catutwan at labanan o iwasan ing peligrung tuturu Da. At ding meging maulagang Credo./creeds: 1). The Apostle's (3rd century; 2). Nicean (325); 3). Nicene-constantinopolitan (381); at 4). ing Chalcedonian (451) Keng casalucuyan a bayung siglo, atin na namang Council of Trent , Vatican I and II at aliwa pa.
Maragul ing meging problema careng Credo, uling e la completu. Alang Credo a apakit na ngan ing catutwan. At deng Credo maina la keng capabalwan/apprehension keng Espiritu.
Pamanlisya keng lilingad e tatangapan deng Atlung alang anggang Divino Hypostases:
— Modalismu: tuturu na ing Dios papakit ya king panaun atlung "stages o Modes;
— Adoptionism: tuturu na ing Dios inampun ne ing taung Jesus at gewa neng anting Anac, uli na ing Upaya na anting Dios;
— Pamanlisya, lilingad na ing metung a Completung Dios;
— tritheism: tuturu na ing Dios Atlu yang micacawaning Personas.
INDIFFERENCE "Alang ulagang Panlalawe"
Dacal la retang Cristiano a alang paki- byang "do not care" nung nanu ya ing Trinidad, iti yang maulagang catutwan ning casalpantayanang Cristiano; Ing delanan at keragulan keng bie cristiano, ing dapat a pamibiebie keng Iglesya anti mung catawan nang Cristo, at ing tawling parasan/destiny,macasalale ya keng Dios anting Trinidad. E ta dapat tanggapan ing i bale wala ya ing panga-lantad/revelation ning Trinidad a Dios.
Mapalyaring magcamali ing belwan keng Trinidad agyamang mayama ta mu keng Dios Trinidad. E sapat itang ating pamanatindi mu. Dapat miras tamu ketang delanan/experience da reng Apostoles: macayama, mabibie, manigobra at papakit a belwan keng Dios Trinidad.
Sasabian nang Martin Luther, e ta ya lalapitan ing bage na ning Divinung Trinidad capamilatan ning kecatamung sariling pamanisip. Deta canung compiansang gagamit sarili dang isip, ila retang Talaturu na ning Dios; aliwa retang cayang pupilu/pupils, "alang taung apalino nang ustu ing Divino Trinidad"; kesa keng gigisanan ta ing pamanisip a pakibalwan ta yang lubus ing Triune a Dios, dapat gamitan tala deng Espiritu batang dalanan/experience ing yumu ning macapagmulalang gagawan na ning Trinidad, antimong Ibpa, Anac at Espiritu keng panlub o pansarili tamu.
1 Thes. 5:23—Ing Dios mismu, ing Dios ning Capayapan, pabanalan na cayu sa at dinan genapan. Manatili co ngan sang alang sagcul at mayakit co ngang sang alang panga pintas king Espiritu , caladwa't catawan — angga king paniatang ning Ginu tamung Jesucristo.
"Mananu na sanang ing mismung Dios ning capayapan papaliarian na cayung ganap a banal at pabanalan nang lubus ing Espiritu yu at ding caladwa yu't catawan manatili la sang alang pangatasa angga king paniatang ning Ginu tang Jesucristo.
Ing Dios ya mu bucud ing panibalan ding canwanan/calam. Birian ning Dios king ila dagul/miragdag la sa king cabanalan (4:3-7) at king ila micasaut la (mabiebie la) busal ning capayapan (5:13). Bucud mung ing Dios ning capayapan ya ing macapisadsad carela king genapan, uling ing Dios ya ing mumugit king cabilugan dang panga-tau (being). Ngara wari, espiritu) caladwa, at catawan; alang pangatatsa nanu man potang miras ne o datang ing Ginu. Ing Dios ya ing manatbus , (2:12) , at sucat yang panaligan (5:9) at ya ing miganap king carelang caligtasan.
King Pamaglalang, ing mumunang tacbang ning Amanu ning Ginu, ing picawani na la ing Sala keng Dulum. Anti murin ing Amanu meging matalas yang espada kilub o capamilatan ning banal a espiritu batang abalu ing pamiyaliwa ning espiritu king caladwa, bangketa ing tucnangan na ning peca nobleng (noble) Dios micawani ya ketang baseng panandam, at abalu tamu nung nu angga ing caladwa mag-submittir ya ketang metung atyu babu. Ken ta abalu nung macananung ing espiritu ya ing lugal a paintunan na ning banal a espiritu ning Dios at nung macananung ing caladwa king upaya na macagalo yang e na gawa, nune caburian ning banal a espiritu mayayakit king espiritu ning tau.
Nung macananung ing espiritu at ing caladwa masyadu lang milelele, antimong daya kilub butul; malyari la namang micacawani. Ing Heb. 4:12 sasabian na, "Ing Amanu ning Dios mabie ya, malilyari ya at mas mataram ya keng adwang-taram a espada, at tutusucan na itang pamicacawani ning caladwa at espiritu at ing daya at tuglungan (blood and joints). Dapat tayang pacaisipan ing caladwa keng espiritu ba ta yang agamit/exercise ing kecatamung espiritu.
Ing Silbi o Gawa, ning caladwa e ne cawangis ning Espiritu. keng Caladwa, daragdagan/substaniate deng bage bage keng sacup ning pamanisip "psychological realm". ing Espiritu, miraragdagan/substantiate ding bage keng sacup ning espiritu, "spiritual realms".
Nganang John 3:6, "Itang mibait keng Espiritu, Espiritu ya", papakit na ing itamu "regenerated" tamu. Bait king Dios a Espiritu, king espiritu ning Tau; at ing John 4:24 papakit na, ing espiritung tau malyari yang lumapit king Dios at mica-conswelu/tumula ya. Anti mu ing "Radio Receiver" papakit na ing "invisible Radio Waves" at lultu lang tutu kecatamu. Ing espiritu ning tau paltu na naman ing mayayakit a Dios at gawan neng talagang tutu at "practical" keca tamu (1 Tim 6:16; 2 Cor. 4:13);
2 John 1:7 — Deng casalang nang Cristo: Dacal no reng maglinlang a macacalat king cabilugan a yatu. Ila pin ding taung e bisang kilala cang I Jesus ya ing Cristo a dinatang king pamicatawan nang Tau. Ing ninu mang anti careng tau, deti ila ding Mapaglinlang at ila ding ANTI-CRISTO.
Ing DOCETISIMO—metung yang maling aral o maling doctrina ding Gnosticos (a linto canita pa mang maranun a panaun a ita at mabie la pa ring Apostoles); Tuturu na king i Jesus e ya meging taung tutu; ing catawan na balatcayu ya mu, ngana wari, palaraman na ing pamicatawan nang tau ning Amanu; ampon ing pamibiebie na keti king yatu, ing pamilasa at camatayan na. I Juan patibayan na king I Jesus micatawan yang tau; tau yang tutu a maki laman at daya (cf Jn. 4:2-3). Ninu man ing tatanggap king mesabing maling doctrina e ya maliaring maki-agum king Dios; bagcus, metung yang anti-Cristo o Casalang nang Cristo, (cf. 1 Jn 2:18-19, 22; 4:3). Nung alayu ing Dios caya, e ya cabilang careng talasalpantayang mengabait ibat cang Cristo.
Ating Cristiano a maki- pag debate tungcul keng Cadiosan nang Cristo; I Cristo DIOS YA O ALI YA? Keng istorya dacal la reng talaturu a lilingad da ing panga Dios nang Cristo. Babaligtaran de ing Banal a Casulatan. At agiang mayap at ganap yang tau i Cristo e ya lubus a Dios. Ing capanwalan keng Trinidad e ya teolgiang pamipalino; iti Divino yang babie/dispensing at e ta micacunung tanggapan ing I Cristo Dios ya. Aminan ta ing catutwan keng Cadiosan nang Cristo.
Roman 9:5 — Ila ring meging palipi ra ding Pariarcas, at ing Cristo king panga tau Na, ibat ya king carelang lahi; ing Cristo a maigit king sabla sabla, DIOS A SUCAT PURIAN CAPILAN PA MAN.
keng amanung English: " many christians have read the book of Romans without noticing the declaration contained in this verse. This verse says, that CHRIST IS GOD, Christ is over all things: Man, Angels, the Heavens and the Earth. Christ is the very God who has been and will be blessed forever and who is overall all...... it is a shame that Christians argue about the Deity of Christ and debate whether or not Christ is God. (note: I have wrote a lenghty article on this subject," the Deity of Christ, the Humanity of Jesus", culled from various articles that I read and studied and most coming from the Bible itself.); (Atin cung acatalamitan canita at pipilit na ing ala cang ackit a versiculu a sasabian nang malino a dios ya y Cristo. Nanu pa caya ing buri nang maging cabaldugan ning Roma.9:5?).
King Bie mu at delanan na, mica panandam na cang y Cristo Dios Ya? Wa, atin na. Dapot e me gagawang doctrina ita? Y Cristo e ya mu Anac ning Dios, nune Dios yang tutu keng sarili na. Ing Dios atiu cang Jesus at ing Dios y Jesus. "Canitang camumulan, atiu ne ing Amanu; ing Amanu cagum na ne ning Dios, at nung nanu ya ing Dios, macanian ya naman ing Amanu" (Jn. 1:1); ing Amanu meging tau ya, y Jesus. Ya ing EMMANUEL (God with Us), ing Dios busal tamu, Iti ing Dios! Y Jesus ya ing caligtasan/ salvation, Hallelujah, Y Jesus Dios ya. Ya y Emmanuel.
ING DALAN PAPUNTA KING IBPA (Way to the Father)
Jn.14:6: Y Jesus ngana, "Acu ing Dalan, ing Catutwan, at ing Bie. Alang malyaring miras king Ibpa nun e mu king capamilatan cu".
King pakibat nang Jesus king cucutang nang Tomas (v.5) babie yang metung a ganap a pamipakilala king sarili na. Iti ing canam a pamamasiag nang, "Acu ing ...." ; King evangelio nang Juan, e macagiung ipakit ne ing Dalan. YA MISMU ing Dalan; e macagiung lalantad na ing Catutwan… YA MISMU ING CATUTWAN; e macagiung babie yang Bie, YA MISMU ING BIE! Ding sablang conceptos at caucluan (abstractions) meging mabie lang personal at iti ya pin ing Persona nang Jesus.
Uling ing Anac, lalantad ne ing Ibpa at aliwa ing sarili na. Ing milalantad ing Ibpa aliwa ing Anac. Anya ustung ackit me ing Anac, ackit miya naman ing Ibpa. King pamisabe dang Ginung Jesus at Philipp king John 14:7; Y Jesus sinabi na caring discipulos, "Nung akilala yu cu, akilala yu na naman y Ibpa cu. Manibat ngeni, cakilala yu ne pin at ikit yu ne". Y Philipp ngana caya, "Ginu ipakit me kecami ing Ibpa, at ita macagiu na kecami"; "Philipp, calambat yu na cung cayabe", nganang Jesus caya, "angga ngeni e mu cu balu?"
King John 14:6—E na sinabing Ginung Jesus, "Alang miras banua nung e dumalan cacu". Ing sinabi na, "Alang maliaring miras king Ibpa nun e mu king capamilatan cu". Ala yang balac Y Jesus Cristo a miras banua, nune miras ta king Dios, king Ibpa na. Y Cristo aliwa ing dalan para miras ta banua. Y Cristo ya ing Dalan bang ding sasalpantaya miras la king Ibpa. Ing camatayan ning Anac at panyubling mie, miras tamu king Ibpa. Ing Anac atiu king Ibpa, at ati tamu king Ibpa capamilatan ning Anac.
Ing Caisipan tau, milabanlaban ya keng pamanisip keng Dios. Paki isip ning tau itang lugal a parasan na … banua o impiernos? Ing pamanisip Dios, pamanisip yang tau at e lugal. Ing tau isipan ne ing banua at sulip/yatu; ing caisipan ning Dios ing Dios at ing tau/lelangan. Ing Biblia painturu ya king Ginung Jesus matanggap o milub ya ing tau, at aliwa itang pamunta na keti king yatu. Ing Ginu meging tau ya at pamanlub na king tau ya ing panyatang na keti king sulip/yatu. Anti murin, ing tau miras ya king Dios, e ya miras banua. Nung y Jesus e ya meging tau, e ya minta king yatu, anya cailangan maging tau ya. Keng aliwang salita, "Inyang meging tau ya y Cristo, dinatang ya keti king yatu". Anti muring ing miras ya banua nung miras ya king Dios. At nung miras ya king Dios, ya pin na’yta ing atiu banua.
Ephesians 2:6 — "king panga yagum tamu cang Cristo Jesus (Col. 3:3), at pepasublian na catamung mebie cambe na at dininan na catamung lugal cambe na caring banwa". Sasabian nang Pablo king ding talasalpantaya macalucluc na la cambe nang Cristo ngeni mu rin king sasacupan ning banua. Miraracayanan na la king damla ning keang panga-ari at king cayupayang ning keang pamanyacup. Ing bie ra macapampam ngeni cambe nang Cristo a cagum ning Dios. At ing tune rang balen yapin ing banua (Fil.3:20). Magobra la para king pangasulung ning pamag-ari ning Dios keti king Yatu king capamilatan ning carelang capaniamban, pamanalangin, pamipatutu, at pamicalat king evangelio (missionary outreach). E ta miras banua keng sarili tamu mu. Miras tamu mu king banua nung ati tamu o cagum taya Y Cristo.
Pakibasa tala deng capitulo 14 anggang 17 keng Evangelio nang Juan. Dacal la reng babasang paulit-ulit dapot e ra masyadung a palino ing cabaldugan na carela. Deting Capitulo ila ring tauli nang amanu ning Ginu caring cayang Apostoles bayu ya mipanganyaya at mipacu king Cruz. Caibat nung simbitla ding amanung misulat carening capitulos, mengadi ya ing Ginu king Capitulo , 17.
King John 14:2, ing Ginung Jesus sinabi na, "Dacal lang cwartu king pibale bale nang Ibpa cu; Nung ala, sucat cu nang sinabi kecayu” at maco cu ban isadia ra cayung lugal carin". Pibale bale nang Ibpa cu – ngana wari "ing banua." Cwartu, "permanenting pagcarinan". Malino keni king y Jesus talus nang ding alagad na atin lang panenayan camtan a caraniwan anti caniti, inia bibitasan na carela ing alang anggang pamakiabe ra king Ginu.
John 15:5, 6—"Acu ing tanaman a ubas"; Icayu ing sanga; ninu man manatili canacu, at acu caya, pasipamunga yang dacal; dapot nung micawani co canacu, ala cayung arapat nanu man. Ninu mang e manatili canacu mengari yang metung a sangang miyugse—langi ya; Ding anti careting sanga tipunan la, at iyugsi la king api at maduluc la.;
Ing pigagap ning mananaman aliwa ing mangutud o ali king Ubas, nune ing palto yang bunga ing keang tanaman, inia gagawa yang tacbang para saupan neng macapamunga ing ubas atin keinan . Pane neng cacaltasan a sanga (v.3). Ing e pamicabunga mangabaldugan king ing parasan nang Jesus para king metung a bie e mirinan catuparan.
King Jn 17;21—Mengadi ya ing Ginu: "Ipanalangin cu king ila ngan maging metung la mu, O Ibpa. Maging metung la mu sa kecata. Antimo nung macananu cang atiu canacu at Acu atiu cu Keca." Ban keta ing yatu manwala ya king Ica ing mitubud canacu.
Pigcaluban cu la mismung ligayang pigcalub mu canacu, ban keta ila maging metung la mu. Antimo nung macananung Ica ampon Acu metung cata mu" v.22; Pepakilala ke carela ing lagiu mu at isundu keng pakilala carela, ban keta ing lugud mu para canacu manatili carela, at Acu manatili cu carela.
Ing Ginu pepaitas ya, cagum tamu, Inya y Pablo sasabian na, miabe abe ta keng luclucan at I Cristo keng pamagtas na, at ing pamagtas na cang Pablo yapin ing Carinan o ligaya banua. Y Cristo minta ya kecatamu king pamagtas/ascension na. Anya ngeni ing Ginu atiu keng Espiritu tamu ketang cayang pamagtas/ascencion.
Keng pamagtas/ascension Na, mitalacad ne ing Iglesya/simbahan ning Ginu keti king yatu. Nung atin ya pang caragdagan a daptan deti gawan na la king ministerio na banua. Ing ministerio banua (heavenly ministry) yang dapat na ning Ginu king cayang pamagtas/ascencion. Ing terminung Pamagtas/ascension sacup na ing leparan na ning pamanuciat na at ing pamagbalic/pamagbaba na keng Cadwa nang Paniatang (second coming); atin nang maigit adwang libung banwa manibat ketang Pamagtas/Ascension Na, at nucarin ya y Cristo ngeni? ATIU KING PAMAGTAS/ASCENSION NA.
King umpisa ning Pamagtas/Ascension ning Ginu, pepaliari nang Ya ing Espiritu "Economically" Ba Yang mitalacad ing cayang Iglesia. Macanian yang megumpisa ing "Ministeryo Banwa" a atiu pa ngeni, (ketang tawling Domminggo a sasabian nang Daniel (9:24-27); Ing Ministry Banwa mapupus ne potang tipa ya Banwa at magbalic ne keti king Yatu.
Keng Pamagtas/Ascension nang Cristo, dela na ngan itang agawa na sulip angga inyang mate at sinubli yang mabie king Banwa. Dela na ing meging bunga ning Pamanatbus nang casalanan ning casalanan ning tau. Capamilatan ning Pamandaya Na king Cruz, pepatawaran nu ring micasala Caya. Nung e ya pepaitas Banwa e na atuparan ing cayang camatayan. Agawa na ing pamamatawad casalanan king Cruz, dapot king Cayang pamagtas/ascension agampanan na ing pamanatbus casalanan. Anti murin keng Pamagtas/Ascension na, a bie na caring Tau ing Caligtasan. Nung e ya pepaitas/Ascension y Cristo, e la mica CALIGTASAN/SALVATION ding Tau.
"E yu na sana pagdulapan o cucutang nung nanu ya o ninu ing sinulat, ing maulaga at dapat tandanan at pakirandaman, nung nanu ing macasulat; ing tau mate at maco ya mu, dapot ing CATUTWAN NING DIOS AT AMANU NA e na mate capilan man." Acj
MARANA THA.... - DATANG NA CA GINU....
QNG LAGYU NING IBPANG WAGAS
AMPON NING MAYUBUNG ANAC
AT ESPIRTUNG MASLAG NING
SANTISIMA TRINIDAD, YANASANG
MISNANG SAMPAT. . .
AMEN
Amor de Jesus — TnG (Talasuyu ning Ginu)
Aug. 29, 2012, Artesia Ca, USA
(Apalit, Pampanga, Philippines)