ING PINSIL AT PLUMA
Neng Almario "amor" C. de Jesus, P.L.
Ing Agila Ning Apalit
Patac patac mu ing uran, dudungdungan cu reng poesia,
Midadayu cu lisangan, macayama la reng rima,
Ding malacac a matudtud, era balu mipacde la,
King carelang panga-gising, talnan da ne ytang pluma.
Calupa na ning galo na, nitang pinsil mung tatalnan,
A matulang maca-aplus ketang telon a panuman,
At mapilan mung pinandit, masaya mu nang paniglon,
Lelangan ning kecang diwa, babye tula't capasnawan.
Neng gugulis ca keng telon, babagayan ning Opera,
Teterac ya itang Pinsil, macawil'ng lalacwan na,
Detang culeng pisamut mu, menaliwa ing aske da,
Ing Modelung pipinta mu, ketang "canvas" milipat ya.
Nung tucyan cu ytang bersu, cawatasang belangcas mu,
Ytang bangcang sasaken cu, magpanyud dare daretsu,
Ecu lubus amalayan , ketang pampang misadsad cu,
Macatiman cung sasaca, king yumu da ring amanu
.
Macanyan la buring sabyan, deng melalang a poema,
Dadapugan na ning api, ing pali na nitang tema,
Malyari lang pacyapusan, ding sunis at indayug da,
Bayang luntu asna tingcad, ing cule ning Amanu ra.
Detang Pintor penganac la, cacambal do ring Poeta,
Yng lulwal kng caisipan, regalu yang ibat banwa,
Eta na dapat magtaca, obat deti aliwa la,
Uling ing Dios a miglalang, minunang Pintor, Poeta.