Nanung Asabi Cu?
Nanung asabi ku o budning poeta
I Kang Amor niting malagung mag-rima
keting abasa kung suglung a poesya
bye nang Jose Risal at kabayang-nya' na...
King gelinga' na mo king amanung siswan
pimani-mani nang mabersung makanyan
lalu kung abalu anting matenakan
anak ning Apalit pagmaragul de ngan...
E wari byasa ya keng pamagdibati
king amanung sutil antimong Atorni
damdam meng dumali keng pamanataki
kareng keng jusgadu panyambut na pilmi...
Dapot ngeni naman ing kayang 'paglaban
lalbug a amanu salitang kebaytan
yang paki-pate na at pakitaltalan
agyang numan miras yang paki-bakbakan...
Anti mo I Rizal a keyang siglawe
kalayan ning balen ya ing paki-pate
sinulat nang libru armas lang matibe
anting balas kanyun sikan maka-pase...
Anya king panawun ngening salukuyan
ing pamanyulat nang kang Amor mu naman
buri nong i-dagsa deng mamayulputan
a amanu ke lwal a bisang manakpan...
Ngana pin ning Guinu king pamangamanu
dobli ya pataram neng mibugnus kanu
lalu na nung iti king pamag-serbisyu
karin ya magamit dangal a prensipyu...
Lwid ka Kakang Amor king kekang poesya
atyu keng magmasid keka manenaya
kareng kekang lalang king amanung mana
lalu yang kikinang ing kekang korona..!!!
Paeng
PL
PLI