ANYA ENA CU MULALA
Neng Almario C. de Jesus (Ing Aguila Ning Apalit)
Dudungdungan keng malale, poesiang, "ena cu mulala"
Obat ecu apigilan, lintu'ng capurit a timan.
Mipasnu ya ining isip, emu acu ing mulala,
Keta nang mengapalyaring, mipabusten a Salita.
Inyang casalungsungan pang, ing cabiasnan panintunan
dacal la re tang salitang, pipiltang pagaralan
mumuna ne ing Tagalog, pilipinung meturingan
ditac a nippon, cantonese, Inglis at saca castillan.
Cabang itang Amanu cung pepasusu king candungan
milele niya mu king suluc, anting marinat a basan
malagad na rugung tutu, iti talnan ke't gamitan
at caibat keng penamulis, ilele cu niya't palangyan.
Ngening meputi nacu bwac, mimina na ing catawan
ing tutu palang maragul, ining cacung pamagculang
ketang Amanu tang Sisuan a dapat sana gambulan
bang iti e dapat mate, mamungang tune manyaman.
Neng paralum ne ing bulan, kening cacung pamaglacbe
ditac ditac mibabalic, king isip at pamibule
ding masanting a tiririn, at tumaylang sacdal cule
at pati na ring basultu, dalit a managulele.
At kening pamanudtud cu, migising cu at mipacde
mekiabe king ANASI, bacu pang lubus misane
mamicudtang cawatasan, rima't bersu cung igale
nung damdam mu ing canta, masaya cang makiabe.
Anya ngeni Caluguran, misasanmetung tamu ngan
dapugan ya itang pali, ning mal a Amanung Sisuan.
Samasan tamung sumulat bang deng anac tin lang tucian
matimbang pa king salapi, ing pamana tamung lacwan.