Matwang Magulyan
Neng Mely G. Catacutan
2/22/2012
Ing tawung mabibie keti babu yatu,
Miras itang horas pacatingiran yu,
Calampas ning edad pitung pulung banwa,
Ing isip magpalta mapangalinguan pa.
Ating buring gawan isip mu mangutang,
O caya nung misan atin cang paintunan,
Listaang gewa mu para keng tindahan,
Madalas malyari kecang acalingwan.
Keng pamamasyal mu menakit cang tawu,
Sadyang siping bale o capagobra mu,
Nanu cayang lagyu tawung caharap cu,
Nanu mang gawan mu e lungub isip mu.
Misan keng Shopping Mall menakit cung matwa,
Pangapkapan no ngan bulsa't pitaka na.
Calwal na Shopping Mall jalos miragsa ya,
Kotsing inisip nang di-rive alayu lugal na.
Riport ne 911 caibat inaus ne,
Asawang manaya't likwan na king bale.
Kalwal na pa dalan pulis sita ra ne,
Uli ning report na ing pulis dekap de.
Madalas malyari keng kekatang ketwan,
Iting sablang bage emu man sasaryan.
Anya panabilin kecong kayanakan,
Eyo batang kalyan deng matwang magulyan!