Ayup
Diosdado P. Macapagal
c. 1963
Linub ya ing ayup qng metung a jardin
Icua reng amasid ding sampaga carin,
Cabud tangalan de ing ari ning angin,
Pilsintan da ne ngan ding camia at jasmin;
Pepaiguit deng lubus quilub ding pusu ra
Caring maluca mung juang at mariposa,
Uling lalung matas ing paniulapo na
Miraras ya uari qng matilo banua.
Ing pangaburi ra alang abe canlap,
Agyamang ing ayup ere balung ganap,
Pangangas dang bina ing leguan dang sicap,
Anting calasag da qng calmang e mayap.
Ing ayup iquit nong macule, maticuas,
Inia digpan na la cambe ing alisuas,
Dapot lugal sana ing samban ning uagas,
Penuctuc nong pengan at penyira punlas.
Caring mabie rosas, O mutyang dalaga,
Atin lang catulad ding sampagan bigu,
Uli ning leguan da matas lang milalu
Ucul da ing sabla bijag da at agyu.
Agyang malagu ca e ca magtiuala,
Qng balang lalapit marangal ya nasa,
Dacal lang lalaquing ayup mung bitasa,
Nanu mang camal mu datang lang manyira!