Bapu Birjen De Los Remedios

BAPU BIRJEN DE LOS REMEDIOS

"Gng lagyu ning Ibpang Wagas,

Ampon ning Mayubung Anac,

at Espiritung Maslag ning

Santisima Trinidad,

Yanasang misnang Sampat".

NUAN! Birjen de Los Remedios,

Ing Indu ning Capaldanan;

Liguran ya't mekilalang

Patronang Mal Patulunan;

Indu re detang Maluca,

Kecatamu Mamilatan;

Ban ing Tibwan tang Probinsya,

Laganap ing Catajimican.

Ketang napun nacadwa na,

Cayari na nitang Guerra;

Ding memalen Capampangan,

Megulu ing cabilyan da;

Democrasyang maleparan,

at manintun catimawan;

Asinderu't Hortilano,

Prinsipyu da milalaban.

Dacal la reng mengamate,

Mengawala at Miwale;

Ding king baryu manucnangan,

Licwan da'ing Pibalebale;

Ing mabilug a Probinsya,

Megulu E mitawase;

Milagro na ing panayan,

Bang tajimic ing Balayan.

Mayap namu qng Balite,

Baryu na ning San Fernando;

Ytang carelang Imahen,

Mibalitang Magmilagro;

Balamu pepaisip NA,

Cang Bishop Cesar Guerrero,

Ipakisabi ne'ng Imahen,

ylimbun de caring Baryo..

Macanyan yang megumpisa,

Ing masanting tang "Crusada";

Cang Birjen de Los Remedios,

At Santo Cristo del Perdon;

Ylang Adwa ding pupunta,

Dadalo caring Anac da,

Pakit tamu ytang tula,

Malugud pung tanggapan La.

Pagcalaman na ca tamu,

Ning Santo Cristo del Perdon;

Keng papakit tamung lugud,

Pamamuri qng Indu Na;

Capamilatan nang Maria,

Y Cristo meging tawu ya,

Inya naman Indung Birhen,

Indu ning Dyos ing Bansag da.

Parangalan ya ing Birhen,

King Aldo nang kebaitan,

Uling ya ing pilulanan,

Ning Caban ning Bayung Tipan,

Nung caring sablang babae,

Nuan ya pin ing Indung Birhen,

Lalu yang Nuan itang Bunga,

Ning atian nang Birhen Maria.

Idaun tamu ing Pangadi,

lumapit ta king Ginung Dios,

Magnobena tang taimtim,

cang Birhen de los Remedios.

Detang Hymno ampon Salmo,

idalit lang misnang miuman,

Ytang Lamac at Pabacal,

babye tula' t capaldanan.

Keng milyaring capaldanan,

tula na ning Capampangan,

balic ing Pamicalugud,

at ing casalpantayanan,

Iti meging panata na,

Pagmasusian balang banua,

Debosyon king Mal a Birhen,

at king banal a Anac Na.

Banwang labing siam limang pulu't anam (1956)

Ika walu ne ning Septiembre,

Caburian ning Santo Papa,

Pinutung de ing Corona:

Reyna na Ning Capampangan,

Patrona ming Patulunan,

O Birjen de Los Remedios,

Pangandi mu ke pu Sana.

YANASA. . . . . amen JESUS.

Almario C. de Jesus

Balen Apalit, Capampangan

Sept. 25, 2011

Nota: (Mecumbira cung gumale poemang Capampangan caibat ning misa, keta king St. Casimir Parish Hall, Glendale, at ing Bapu VDLR ya ing poesya cu.)

»pakiramdaman yu ing audio file