Ing Balen Cung Apalit
Ruby Cabrera-Camaya
Sucad, Apalit, Pampanga
Sampaga cang maslag busal ding balayan
Mabanglu’t masamyu queting lalauigan;
E raca paglibe balen quesanu man
Pablasang bantug ca’t maca-puc qng dangal.
Mapilan mung banua cagpa nang Magellan
Lagyu mung maula canita mipundar;
Dutung yang tinubu quecang penibatan
Melabung minyanga arap ning pisamban.
Ing tinubung dutung casebian ya dagul
Apulu mang tau e re pa acaul;
Qng tibe at tatag e me api-ucul
Caniting Apalit lagyu na sinibul.
Ding queyang barangay mica lagyu la ngan
Basi caring santo at capanintunan;
Atin namang lagyung quingua qng tanaman
O ulirang tau matas a dangalan.
Ding queyang memalen e co ipaglibe
Biasa la’t masipag ’ting ganacang tagle;
Iyarap quenu man e mo picarine
Maticas lang miblas, quimut da disente.
Ding Apalitenios manimuna la ngan
Matas a pusision miyaliuang larangan;
Ipuc dang balen da carelang taguimpan
Qng pusu ra’t isip e ya micacauang.
Nung pagumasdan me ing balen cung tibuan
Surian mu la ngeni pati manungculan;
Gugunia’t magobra at mitatambayan
Ban lalung umunlad ing queyang cabilian.
Ing balang barangay atin yang asican
Abias ding memalen carin manibatan;
Bihira lang tutu ring e manintunan
Uling numan carin atin lang gagauan.
Nung macananu ya ing dutung Apalit
Casalpantayanan macanian catigic;
Malabung, matibe, e biasang mangauit
Ban agauang banal ing balang penandit.
Ing patulunan mi’ng Apostol San Pedro
Ing mumunang Papang telaga ning Guinu;
Iglesiang telacad babo niting batu
E ne agiung daigan asbuc ning infierno.
E que ipaglibe ing balen cung tibuan
A tatangalan cung masaplala’t banal;
Uling quening pusu matatac miquintal
Ing lugud cu quea angga man capilan
Luid ca balayan cu, Apalit cung tibuan
Luid la ring anac mu — masipag, marangal
Sunlag cang maningning queting lalauigan
Ban tularan daca sablang Capampangan.