GIL P. DAVID, ING BALAWE NING APALIT
Ing Balawe Ning Apalit, hilig na ing maglalawe,
Careng dalagang malagu, a lalacad kimbe-kimbe,
Mayama yang sipat sipat, at mangisnawang malale
Uling ytang atsing Vicky, magbante yang masalese.
Anya istung mipuslit ya, ing damulag daig nepa
a mibulus ketang cural, detang gaindu panagalan
Mabilis yang macatalan, at agad na nung panuman
Ing swerti na deng babae, era ne man panginlagan.
Macanyan ya y Gil David, Ing Balawe Ning Apalit,
Ene susulapu matas, angga ya mung sicad sicad
At agya mang matwa na ya, at pile nu ring bagyos na
At ne pa bilis manuctuc, saguli macasagmit ya.
Salamat qng kekang Puna, kening malucang Agila
Ing sulapung gagawan na, angga niya mu keng mamwesya,
Uling ing cayang parasan, Ing Amanu minunu ya
At anting Anac Apalit magpilit yang manimuna.
Anti na ing Pamuntuk ca, Apaliteneous aguman
Magmasabal naca sana ketang Amanu tang Siswan,
Eme dapat picarine, madalas me sang gamitan
Pakit tamu caring sabla ing tune tang Capampangan.
Luid ca O Apu cung David, Ing Balawe ning Apalit,
Luid la ding Apalitenous a abe ta qng aguman
Samasan mu ing sulapu, panginlagan ing Tsismisan
Yan ing lacwan mung pamana tandanan ding cayanacan.
Amor
Ing Agila Ning Apalit