ING PINTOR A POETA
Neng Amor de Jesus, (Ing Agila Ning Apalit)
Nung Arte ing pisasabian, ninu mu reng apili mu,
Careng taung lelangan Na, keti babu na ning Yatu,
Yla retang mica belwan, pamag lalang cawatasan,
Pamangulis ketang telon, mangasanting a larawan.
At e balang lelangan Na, mayayaus lang Poeta,
Pigcalaman na lang grasya detang anggang apili na,
Uling ing Dios poeta ya, inyang lelangan ne ing yutu,
Ibat pa king camumulan, megamit ya ing Amanu.
At ding Salitang binie na, anyang gulwan ne ing Babel,
Ding Poeta yla retang, migsalitang anting duldul,
at midinan cabaldugan, ing sablang buri dang sabian,
king paralan na ning dalit, himmo, salmo't cawatasan.
Anting metung a Poeta, atin cang dapat gampanan,
Mibalangcas cang poema, babye masanting a Aral,
Pili la ring amanu mu, at ala sang cabastusan,
Pacamalan me'ng amanu, binie na keca ning Guinu.
Ketang ing yatu bayu ya, ditac la pa retang tau,
Panga salbag na ning Babel, medacal la reng Amanu,
Madalas era aintindyan, at ing gewa rang paralan,
Gugulis da careng batu, ytang buri da ping sabian.
Macanyan lang megumpisa, meca Pintor la ding tau,
At sinulung ing belwan da, ginamit na lang pintura,
Gugulis na la keng papel, telon, yero, at imalan.
A larawan da ing sabla, ketang agyu na ning diwa.
Ing poeta king amanu, lalalang yang cawatasan,
Menibatan king Isip na, ding salita bubugnus na.
At ing Pintor mangopya ya, acakit ning cayang mata,
at lalalang ya mu naman ketang laman ning diwa na.