Inda, Caluguran Daca

INDA, CALUGURAN DACA

Neng Almario "amor" C. de Jesus, P.L.

Ing Agila Ning Apalit

Inda, pabanwa na ngeni, panaung agad dinalan,

Aldo ning kematayan mu, malungcut cung gaganacan,

Keni na qng caisipan, eca midayu't kelingwan,

At balamu napun pamu, anang sakit mu keng licwan.

At keni nang panuli cu, ketang maluca tang baryu,

Ytang sadyang balung lugud, yamu namang balican cu,

Uling tenam king isip cu, nucu man danggut ning yatu,

Panalala't lugud keka, yang maging cayantabe cu.

Eme sana gaganacan, ing bungsu mung pacamalan,

Wali cu cacung lingapan, caba ning bye cu ingatan,

Uling yanamu ing bacas, anting metung mung larawan,

At ngeni nang ala naca, ya na ing cacung luguran.

At deta nang kekang apo, nung ackit mula mu sana,

Masanting lang memagaral, at byasa nung magpamilya,

Ala cung meging problema, mayap at magalang la pa,

Yti uli ning lugud mu, pekyapusan cu't amana.

Ytang baryung beitan ta, mal a baryu Cansinala,

Agyang likwan cu't mendaywan, canacung agaganaca,

Babye cu ing pamanyaup, gawan cu at e tucnangan,

Ing bisitas na ning baryu, mayari ya ping lubusan.

Ecu naman cacalingwan, ing lugud qng Apung Guinu,

At cang nuan a Apung Maria, matigik ing debosyon cu,

Ing patron na ning Apalit, O San Pedrong Patulunan,

Ylang cacu mamantabe, pamangadi qng Miglalang.

Macanyan ing bye cu ngeni, o Indung mal dili cacu,

Masaya cung manintunan, siping na nining abe cu,

Dit man ala cung problema, caring supling a bunga cu,

Aturu cu ytang mayap, salamat keka Indu cu.