Caring Quecang Labi
Caring quecang labi dindam cung siuala,
Musicang malambing qng pusu't diwa,
Lumacad cu't tucnang, ticdo o magkera,
Yang darandaman cung antimong tumayla.
Caring quecang labi tinando ing timan,
Bulaclac la uaring rosas inyang misan,
Isitsit cu queca: :"Ing mal mung larauan
Ya mung mica-altar qng pusung sugatan".
Caring quecang labi quimi mung binigcas
Inya mu neng misan, pacamalang uagas.
Cacu e malyaring magbayu't cumupas
Manatiling banal iti anggang uacas.
Caring quecang labi, canita tatangi
Qng mapaling lugud malale sinuri,
Ibat na canita me-inang la uari' ng
Misarang misara masaquit ibusni.
Caring quecang labi canita mibabat,
Cabas da cabibi a biglang micabat
Ing laman da sana nung miuman cuang ibuclat
Perlas mung pacamal dalise at tapat.
Poema, belangcas neng Cacang Amor, San Nicolas, Capampangan
Iginale neng Amor, Ing Agila Ning Apalit.
»Nung buri ye pung damdaman ing poesia, clik ya mu ing link (follow directions in target page).