Atlung Tanaman A Dutung: Metung A Puna
Kang Amor, anti ka mong dutung tinubu king bunduk
kayalimbawan da retang kekang tituk
ding atlung tanaman a bisa lang mipuk
king karelang planung a-isip king buntuk...
Ing kekang istoryang pawang makarima
pimani-mani mu king kekang poesya
a kapilan pamu da kang akilala
ing balaku sana e ka man poeta...
Dapot ngening tinud king pamangaylangan
ing misaka yasa ing amanung siswan
tane malulumud king kalala-lalaman
kayabe kang sagip da reng matenakan...
Ding kekang papasyag mapilan nang ukdu
mangatas la uri king pamangamanu
tinud lang miyatas panga-koronu mu
metung kang mebilang mibili king tronu...
Ing mutulid keka e mu man kaburyan
ing minutus mekad itang kekang belwan
Lugud king balayan, king amanung siswan
bukud magpatune, panga-Kapampangan...
Oyan mayayakit kasyas at tibe na
ing karutungan mung dutung ning poesya
dutung ka king bunduk, dutung ka king lawta
at dutung ka naman karin king tribuna...
Paeng
PL
See Atlung Tanaman A Dutung nang Amor de Jesus, P.L.