I Seksing Gareta

magayut ca pangaticdo, malagu ca panga-asintaqueng balangcas mu at sucad, anyu cang seksing dalagamacaba la ding binyas mu, balangquinitan yang cajamacabayung Gloria Diaz, macalumang Maria Clarapabustan meng ilarawan cu'ng maleguan mung catawanmanibat qng quecang buntuc, buldit at quecang dalpakancanita apiwari da deting sablang manungdungannung mananu ca cariquit o Garetang panambitanyang Pawud mung ing ubug na iquit me wari i Lorna

caretang pipunang cuayan, misbung ya waring Princesa

ing agud ning queyang gulut misna lamyus qng curbada

ulad ya waring cucusad bayu miapsang mariaposa

itang lubiran mung Sacle cang Pawud macapaquintas

quetang batal ng Calaquian calaguyo yang capilas

yang pamilmi ng siguru, buldit mu e biglang mituas

o yng Ortelanu't San Pedro, banua miquit lang e oras

ding Manu mung maba binyas iquit me wari'y Rosanna

panggalamayan lang bitis sactu la mu qng caba da

balang takbang ng Calaquian butit lang tatagquil queya

inya nanu man cabayat, alang gatul ing gulyut na

itang Sinsa mung palapad ya naman ing magmantinian

macasakmal caring manu lalam salu ng Calaquian

pota queng bayat mung sake, buldit mu acuang mituasan

San Pedro nama't Calaquian, ala queng oras micomustan

yang maporma mung Dagarag maticas ya qng panubug

ing sapu da caring Manu puwad la wari ibat qng tud

ding Suleras mu catawan matibe lang alang catbud

queng ticdo mu at talacad dalaga cang maintun irug

mingatbang Gulung mung dutung Demeyk la pang sinauna

paganaca ing caleguan ning majinjing Maria Clara

ilang peka-balacang mu, babie legua't timyas queca

detang mudernung degoma, tibe'at sinting calawut da

ing Eje mu lalam ding puwad, mamabit caring balacang

musculu yang babie puersa quetang queyang ka-bacal-an

queng tibe na at linatnat susucu ya ing calawang

quetang grasa mung paglaru, talusad lang kasukasuan

o yang pang-Lande mung cuayan, atiyan me waring linapat

nung caretang magpaseksi, cariryan ya qng cabanat

ala yang capusun-pusun, direchu ya pangasapad

nya pangaras queng cargaan, yan mang tractora miaslat

nung misan yang sasaque da queca mipapasalipo

nung wari sa qng imalan lalto yang medyu macuto

at banting ing quecang saque e queng awang pacatando

tumpaq de queng quecang salu, ing Labayan mung matumbo

magmantini queng Labayan apat lang cuayan a Tabsuk

papaku quetang timpacan apat ng mingatbang suluk

quetang queyang pangalapat malapad ya pangalukluk

inya 'gyang doblyan yang lamnan, alang sala yang midapuk

ing culang na mu canita ing panginuang Ortelanu

a queca queyang pagulyut cang Calaquian a boypren mu

at sacaling quebayatnan siquoti ne i Baintau

nung masdan da co canita, kodak co waring letratu

Pugue ne pu ning malucang lingcud,

Anac Ning Arenas