SINTA KU
Neng Maria Eloisa "Babylee" J. Manaloto
Atlung pulu't limang banwa
Sinese cu tune sinta
Quing pusung alang calupa
Lalaking meging asawa
Meliswas ya ing pusu cu
Quing santing na't pati mata
Magningning anti mong tala
Lalu na neng matula ya
Sinta queng alang capara
Catuglung ning pangisnawa
Bandi ne pin ning pusu cu
Ligaya ne ning bie cu
Sinta cu queca pacamal
Iti sumpa angang uacas
Meging sulu minye lingap
Ing lugud mung e quinupas
Adwang anghel meging bunga
Sintang sidsad wari banglu
Minye tula at pag-asa
Cayantabe quing pangatwa
Cacung liyag at canacu
Ba't melakwan cu quing dusa
Tengisan cu babo lugma
Lungcut libayan sang tula
Anga't titibuc ya ing pusu
Queca ngan pin iting sinta
Quing bili cu't tune lumbe
Lingap ning cacung caladwa
Macananu man ing saquit
O! nanuman pati caplas
Megutgut ku pilubluban
Lagyu mu ing sasambitlan
Nung malumbe ya ing pusu
Quing angin ipatad mula
Ing lugud mung para cacu
Pulisan lua ding mata
Sumangid ning calungcutan
Ubas cumong quetubasan
Anti mong mayumung alac
Leguan cung cecang pilsintan
Quing Guinu cecatang adwan
Aldo't bengi cecatang pudyan
Bendisyunan bang acamtan
Tulang alang capupusan