Ing Cuayan

ING CUAYAN, a K-Pride

Neng Almario "amor" C. de Jesus

Careng mamuntucan, KPride a aguman,

tanaman a Cuayan, sana pacyapusan,

dasnan ne ning bagyu, sigwadang masican,

ducu ya king gabun, cayang palabasan,

ditac mung pinandit, talacad ne naman,

nanu man ing datang, e ya mitacutan.

Ytamu king K-Pride, anti ta sang cuayan,

e ta sa pasambut, ketang sigalutan,

yti pamanyubuc, kening catatagan

matsurang milabas, dapat paimburisan,

at ing pake tamu, K-Pride a aguman,

luguran yang lubus, Dangal Capampangan.

Luid ya ing aguman, puluc Capampangan

Luid lang menatagan, dapat ta lang supan.

acdj - Ing Agila ning Apalit

Artesia CA USA