Radyu

Radyu aliwa canitang ala pang kuryenti malagu ya kule dalumdum ing bengi at neng e pa sikat yang makaingeng TV caibat ming minapun, radyu ing bisyu mi paboritu miya itang Tang-tarang-tang di Pugu at Bentut a bubung mitatang queng carelang papil saksakan la mulang

quetang kalokoan da, mangasyas ka sikang

buri miya mu naman ing Hamon sa Kampiyun

di Pugo, Patsy, at kalauk dang campun

neng Sabadung bengi itang dating Kampiyun

pilaban-laban de nung ninung manamun

carin ya mitanyag y Nora Aunor

tubong Bicolandia, lahing Villamayor

cayanacan na pa ka-bosis neng cantor

nya qng kampionatu, ya ing meka-iskor

canita ya megumpisang mag-artista

y Tirso Cruz da III ing queya timbal da

dacal la rin guewang hit a pelikula

abe de'ing munika dang Maria Leonora

pakiramdaman mya murin y Tia Dely

ustung gatpanapun neng bandang 2:30

ing problema da reng queng sinta tureti

susulat do queya't da-drama no deti

caibat deng dinrama dinan na lang payu

anya inaus deng y Dely Magpayu

nung nanung gawan da deng e makibalu

bang queng maling sinta e la mipasubu

buri que’itang patalastas nang "Silver Swan"

toyu dang penimpla queng bangus a prituan

ngana, "hmmm, kabanglu, kanyaman mu ulam?"

"ay, bangus lang pritu, 'ting toyung Silver Swan"

ustu namang ugtu y Roman Rapidu

bandang ala-una neng aldo Duminggu

pane lang barilan, bida at bandidu

careng armalayt da, amunan lang duelu

nyang guewa reng sine, y’FPJ ing bida

nung nu ya tinabung pera qng takilya

caretang poster queng sine didispley da

lupa yang matapang, bayaning guerilla

ustung bengi naman y Capitan Radyo

anti y Superman, super ya at hero

ausan ne’y "Aring Tor", makalawe babo

sabe ya ing kildap, lundag neng sulapo

bayani ya naman y Capitan Radyu

balamu'y Superman, magligtas yang tau

detang mangamulang dakpan no ding loku

balang mangakulung quetang kalabosu

metung ya pa itang Beinte-Cuatru Oras

cuentu lang bie patingapun mu't kabukas

queni mu apansin at lubus awatas

dumurut ya'ing yatu, abayu ne'ing bukas

anti mo ing tinud queng tiket supistik

mamalis yang dalan, mumura't lilintik

obat queng palis na, kabud niya apitik

ing tiket supistik a makatumbalik

iniang linawe ne, aba bayu ya pa

at queng queyang petsa, 'bat ya pang mibola

silparit ya wari bilis qng sulpit na

tsinek ne caretang diyaryu nung tinud ya

aro Inda cung Piang, kalawe qng pers-prais

bigla ne pu kanung mipa-biutipul- eyes

detang queng tiket na ...uno-dos-tres- por-sais

ila rin queng diyariu ...uno-dos-tres- por-sais

malagua't salita tinud ya'y Tiburciu

metung la pung milyun ding tiran nang bultu

nandin pa mung abak, mamalis yang patiu

bukas metung da ne retang milyonaryu

at siyempre neng Jueves bengi ning Krisotan

quen yang DZAB, radyu Capampangan

Poeta Gallardo't Muldong a batican

ala kang itulak, queng pamibadbaran

bayu ya pa'y Ima mekasaling radyu

maki-pakirandam la mu di Coya cu

queta cang Dang Bari, bandang danggut baryu

neng kaibat minapun, lalakad lang grupu

dapot panyatang na ngeni ning kuryenti

e ne kasing-lagu dalumdum ing bengi

den mang makawiling alipatpat dati

e no mangomustang daratang kekami

at pati ing TV'ng ngeni pagkabisyuan

mas perwisyu ya'ta kesa keng kayapan

keng sobrang panalbe deng matua't kaynacan

misan mangasalwak- sabi ing kabyayan

pugue ne pu ning malucang,

Anac Ning Arenas