Ing Dila Ning Tawu
ING DILA NING TAWU
Neng Amor de Jesus, (Ing Aguila Ning Apalit)
Itang dila ning tawu obat cailangan banten ya
Uling tictac ya cabasa ketang pipaglugalan na
Anya naman ing madalas yti mangataluras ya
Anya macapanasakit at matsurang lulwal caya.
Dila calati nang bage, a parti na ning catawan
Obat ya pa ing tuturu ke tang bye mung dadalan
Ya itang maging sangcan ketang mayap o carucan
At agya mang malati ya, eme pu dapat lalatiyan.
Anti ya mu waring timon nitang maragul a barcu
Nung nun me iti cabigan, ing barcu carin ya licu
O anting aping mapali, a menibat king palitu
Nung eca binang mimingat, dagul ya at micalucu.
Deng mangarawac a dila, ila retang mapanyira
At ala na lang gagalang, alang tacut magsalita
Anya panginlagan da la, demonyu ing calupa da
Era isipan ing lulwal, misnang dinat panasbuc da..
Ing tawu agagamit na, ing gelingan a tagle na
At agyu nung apapatunud , patucyan ketang buri na
Deng miyaliwng "animal, detang ayup at asan pa
Obat keng sariling dila, ene apatuki caya?
Madalas pang malilyari, ing dilang mapagindredos
Panyiran na la dangalan , at sobra pang pamagbastos.
At ala nang pacundangan, maging bunga ning depatan
Ing sakit a penandaman, maragul camarinayan.
Ing dila keng pamangadi, ing Dios keca yang pupuryan
Adwan mu ngan ytang mayap, pati na ing caligtasan
Dapot sumangid na nita, dila anti ya mung sundang
Neng palmuran me't libacan, ing cawangis ning Miglalang.
Ot deta naping tanaman, metung yang uri ing bunga
Nung mangga ya ing tanaman, mangga ya naman ing bunga
Obat ing metung a dila, detang bunga na adwa la
Ytang metung cayapan ya, yng cadwa naman maroc ya.
Dacal at sobrang perwisyu , nung sanga sanga ca dila
Anya keng pamagsalita, ing casebyan sasabian na:
"Bayu ca manatsa natsa, magsalamin capang capsa
Ba mu rugung ackit caca, mata mu king muri misna."
(Diwa at Aral menibatan keng Bayung Tipan)
acj
»listen (audio file)