Ing Cacung Amanu
Ing Cacung Amanu
iniang mibait cu queng e ninung seria
carin cu misapuac libutad taldawa
linuwal cu qng yatu queti qng masala
siping nang Ima cu't Tatang cung maluca
sisuan queng Amanung cacu da penuala
ya ing Capampangan, queragul cung dila
salita queng gamit sasabi, mangutang
nung atin cung buri o atin cung aduan
ya ing salita dang canacung aintindian
detang sablang tau queng capaligiran
ya ing panyabi da nanu mang pisabyan
siryosu o birung e quetunantunan
dapot dintang la ding banuang pamagaral
queng bie mi'iqueng anac anting mamirapal
carin qng escuwela carin que micural
e que macatali, pero macapugal
ing batas ding mestra yang carin mimiral
ya canu ing mayap, lub e que susucal
at membiasa caming sumulat, mamasa
mamilang, manguenta, aliwa pang sabla
at atin pa palang aliwang salita
bucud qng amanung quesane ning dila
tiru deng Tagalog, Inglis at Castila
at ing Capampangan mipimpin yang bigla
ngening mipalaut ing bie cu qng yatu
maquialubilu queng mialiwang tau
macapagmulala balang acarap mu
aliwa la naman salita canacu
at tuneng e sapat ing Capampangan cu
cailangan cung magcas banyagang Amanu
at ing cacung dila sintang Capampangan
malagad cu ne mung maliaring gamitan
istung maninap cu, neng ating isipan
queng cacung pangadi o queng pamigunam
istung susulat cu cang Ima at Tatang
o neng macauli queng baryung beitan
ing cutang cu ngeni, caninu ing sala?
qng cacung Amanu nung mecalinguan ya?
detang talaturu carin qng escuwela?
o detang pengaring mengarap bie queca?
ing sarili kaya, queinan ning caladua?
maquibat ca cacu, macudtang poeta!
07.Mar.2010
Anac Ning Arenas
»Nung buri ye pung damdaman ing poesia, clik ya mu ing link (follow directions in target page).