Nanu Man Sa

NANU MAN SA

neng Rosario Tuazon-Baluyut

Nanu man ing saquit, nanu man ing caplas

Nu man anti pait at sidsad qñg bayat

Ing cacu ibie mung qñg pago itumpac

Pauang mayumu ngan nung queca menibat,

Macasiclaud cung macagong a gamat

Manayang parusa cacu mu ipatad.

Cabislac ning pusu, catuglung inaua

Maulagang pibandian ning cacung caladua,

Babo ning pangacu a sumpa cu queca

Qñg bie't camatayan e cauanian daca,

Macanian cu ngening tapat manenaya

Qñg sablang atul nanu man sa ita.

Maguing pa-uquiat me itang pibitayan

Nung yang ligaya mu canacung tuparan,

E baling magabac ing cacung panamdam;

Ica man ing sulu qñg cacung burulan,

O ica pang matad qñg tauling cutcutan

E cu rin tumutul angang cauacasan.

Qñg catataulian man dumame cu queca

Cabang ding tacde cu masican la pa,

Pusu quilub salu angang titibuc ya

Queca ing pacamal, queca ngan ing sinta;

Iti susumpa cu anga caring banua

Bandi mu ing lingap ning cacung caladua.

Nung atin cang lungcut libayan cung tula

Nung atin cang pusan cacu ibie mu pa,

At nung malumbe ya pusu mung maliasa

Pabustan meng saglit cacung pagtumaila,

Potang tatangis ca babo na ning lugma

Cacu lang pulisan ding papatac mung lua.

Sacali qñg bie ta dinatang nang uacas

Ala na cu queca caring aldo bucas,

Aguiang qñg angin mung qñg biga paitas

Ipatad cu queca lihim at banayad;

Ing panalala cung e biasang quinupas

Angang capupusan ning tauli cung singap.

Baculud, Atenas ning Capampañgan

»Nung buri ye pung damdaman ing poesia, clik ya mu ing link (follow directions in target page).