Ing Makisake

ING MAKISAKE

Neng Almario "amor" C. de Jesus

Aru Abe panan da ca,/ nung bisa cang makisake,

Ba cang mabiasang mamangca,/ magdala ca sanang bagse

Kening bangca nung saken me,/ manimbang cang masalese

Pota cabud niya mu mityab,/ sana biasa na cang cawe.

Ytang bagseng tatalnan mu,/ catumbalas ne ing pluma

Uling ing bangca tuki ya,/ nung nucarin me ypunta

Ketang cabig a gawan mu,/ ketang bagse mung tatalnan

Bandang Cayli, ketang Wanan,/ yta agyu mu ngan puntan.

Pamanyulat cawatasan,/ gagamitan ya ytang Pluma

At e ca sa micacunu / cawatasan ibugnus ta la

Ining bie a delanan mu, / dacal na ing menga-simpan

Ketang Caban ning isip mu, / samasan mu lang calcalan.

E cu rugu biasang dili, / at e cu magbiasa-biasa

Pamagaral cawatasan,/ cailangan ing magtiaga ca

Magsane cang masalese,/ at e ca malamarine

At nung atin cang e balu /, mangutang ca careng cayabe.

Gawa cang metung a Padrun / o modelung ausan da

Yti yang kecang gamitan / pamangawang Sucad, Rima

Cantang ATING CU PUNG SINGSING/ yang padrun a mayan tukyan

Deng sylaba anam anam / ketang tauli Rima la ngan.

Sige, magumpisa na ca / ing paskil mu panayan ke

Abe Abe Kapampangan /, matula lang mamanalbe

Keng metung a maki-abe,/ a manigaral gumale

Ketang Amanu dang beitan, / capilan man e ne mate.

acdj 2014-09-29 20:00, Artesia, CA

Public

Almario C. de Jesus

·

ALMARIO "amor" c. DE JESUS-

ING APU CU, GAROSA AT KALAKIAN

Nang Simang Leyson, (Poetessa Macabebe)

Ing Garosa nang Apu cu, gawa yamu ketang kuayan

Yti ala yang parugang, aneng cayan gugulyutan

Agyang mababa ya yti, agyu ne nitang Kalakian

A Damulag a sese na, madalas ming gagatasan.

E pu anting capangayan, manyaman ke pu Almusal

Gatas na nitang Damulag, titiltil mi ng Pandasal

Anya yta nang Pandasal, misna ya pu calinamnam

Nung malwat me pang isoso, bayu subu king acmulan.

Neng pakiskis ne mang pale, ketang Garosa isake

Agad na na cung sabianan,Inang tuki na ca dale

Mamirapal na cung gayac, ing garosa lundagan ke

O caya maki-angcas cu, keng siping na macalele.

Ing Balayan yang saria mi, medyu malaut yang bina,

Oneng e cu mangainipan, e cu meranup bitasa,

Dacal la retang tindahan, aga-agape a bale,

Aneng dagul ing pisamban, at malwat cung miglalawe.

Lalacad la ngan deng tau, keng dalan salasalabat

Pagmulalan da cu rugu, ketang cacung panga-atyat

Babu na nitang garosang menibatan king marangle

Gugulyutan ning Kalakian king Plaza macacalale.

Yti e cu acalingwan, parating lulub king isip

Inyang mabie ya'y Apu cu, at caya cu maca-kilic

Buri cu sana ping gawan, nung muli cu at mabalic,

Keng lugal cung keragulan, a masaya at tajimic.

acdj