Crissotan

Melanie Cunanan Naguit 6:00am Aug 10

... balamu makalukluk ku king kilub teatru...taimik, manalbe at makiramdam kang PL Mang Paeng at Kong Elysian ... kaburi ku pu kanini, Ari ning Parnaso ! ... ot kalambat na pu ning pakibat ng PL Mang Almario?... mainip na ku...

Edgardo Bonus Sale 12:15am Aug 10

Panenayan tayang mangimatulitran ing PL AGILA ning APALIT .Almario C. de Jesus.. nung ngana paya kening munang talakad he he he .. MANALBE KU MU PU ...

Elysian Tulang Liham 8:14pm Aug 9

. . .

.

Mumunang Pamanalakad

.

.

Ing mayap a aldo babie ku kekayu

Kekong atyu keni’t Lakandiwa tamu

Mananu na sanang pakiramdaman yu

Ding ibalangkas ku’t mapinung amanu

“Ing dapat parusan mikasalang tau”

Ing kaku mitukud iyang paglaban ku.

Ing parusa mekad nung iyang masunud

King kakung kabaluan ing masanting kabud

Ban egana-gana pangalo makatud

Alang sasaliwa, alang makabukud

King agus na ning bye alang malulumud

Ding pamilya tamu manyaman la tudtud.

Iyang mikasala dapat yang parusan

E mu para kaya nung gumaga ya man

Iti alimbawa karetang keraklan

Ding gagawang marok e na pasibaywan

Idagdag kanita keyang kaisipan

Lumino ya diwa at kapilubluban.

Ing parusa naman dapat yang ipatung

Kareng mikasala nuya man karagul

Ambus na malati ing gewa nang bukul

Tampan ya ing gamat o kaya pakulung

Ing pamamatawad iti e ya ukul

Lakwas na karetang ugaling ulupung.

Rafael Maniago commented on Renato Alzadon's post in Pamag-aral King Literaturang Kapampangan.

Rafael Maniago 6:01am Aug 10

Ikit ta ya't dimdam king pamagmatulid

poeta kang Ely, salita pinyagid

king ing mikasala king karok mibulid

parusa ipatung kong pangatalabid

e-kapatawaran, ing kayang tatyid

Rafael Maniago Ikit ta ya't dimdam king pamagmatulid,

poeta kang Ely, salita pinyagid;

king ing mikasala king karok mibulid.

parusa ipatung ning pangatalabid,

e-kapatawaran, ing kayang tatayid

parusa ipatung, king taung mitakid...!

Ing tutuking munye matulid a gasgas,

ipakit na neman niting magalasgas;

I Kakang Amor pu, agilang matalas.

a-tubu Apalit, pakit na ing gilas,

lawen ta yang gale, keng pamanalastas

keng pamag-krisotan, ya na ing mag-koplas..!

Ing Kapatawaran, a dapat Igawad

keng mikasalang nwan, kekata ne yatad.

CADWANG TALACAD nang

ALMARIO “amor” C. DE JESUS

Panig - PATAWAD

Salamat, salamat, budning Lacandiwa

Keng pakilala pa, midinan cung diwa

Anya mangapcap cung mayap a Salita

At pamagmatulid batang Abitasa

Taung micasala Parusa mistula

O Patawad caya lugud a Mipala.

King bagsic ding Balas, a pamagmatulid

Anti lang "Armalite", king pusu sasagid

Menga tulala cu, at alang a isip

Bisa na cung matras, mula'ing Pulandit

Uling ing PARUSA, cagaling nang Misip

Anya Mengadi cu, ba nang Magmatulid.

"Ing Utang mi keca, sana patawad Mu

Anting Patawad mi, kecami menutang"

At abitasa ke, ing Dios a Minyaclung

Malapit niyang Mate king crus macayungyung

Adwan na king IBPA ing capatawaran

Caring tau'ng maroc, a menampalasan.

Dios Mematawad Ya careng micasala

Tau'ng lelangan Na, ena tucian yta?

Nung Patawaran me Micasala keca

Anti cang Memintu ketang caburian na

Uling ding Lelangan , Mal lang tutu caya

PATAWAD, PATAWAD, Yatu cailangan na.

ELY SALAZAR

Katlung Talakad - PARUSA

.

.

Masanting ya bungad kakung katunggali

Bayu ya minarap oyan pang mengadi,

Pangaibat binggit ne ketang bandang tauli

Nganang JesuKristo “Patawad kareni…”

Anya keng lawe ku ing kulang ya iti

Ing Kayang delanan e naman sinabi.

Bayu ya mipaku iyang Ginung Anak

Dakal kasakitan minunang aranas

Anting melatigu mabayat at maplas

Mabilug katawan mengapmu Yang sugat

Kaibat memusan Yang kurus a mabayat;

Iti parusa yang alang makasanak.

Ing pikuanan yu pu Banal a Bibliya

Iti, iya mu rin ing iyampang keka

Dakal akit keni nung kareng parusa

Ing Ginu tamung Dios karin na pedugpa;

Silaban neng Sodom ampo ing Gomora

Pepalbug ne’ng yatu king aldo nang Noah.

Karapat-dapat mu ing pamamatawad

Kareng maganaka’t matulid a lakad

Oneng e ya dapat iyang tawad-tawad

Karetang palalu’t king dinat magbabad

Nung kasalanan da iti sagad-sagad

Anya marapat mu ing marok mapatad.

Rafael Maniago King katlung talakad mabayat ne binye

ining Kakang Ely, deng kayang siglawe

manibat king matwang tipan ne linawe

angga na king bayu anting pamibule

kaya ing parusa anti neng pakyabe

ning palpikasala, tantu neng yagape...

Manenaya tamung kadwang talakaran

bye ne kakatamu I Kang Amor kanyan

armas nang tinipun bugnos neng supilan

king pamag-matulid, palto ing sikanan

ing Pamamatawad, banal katuliran

ning palpikasala, metung a lelangan

Capat a Talacad, nang

ALMARIO "AMOR" C. DE JESUS

Panig - PATAWAD

"Lex Talion", "Eye for Eye", gisanan Palipi,

“Salvage”, “Rub Out”, “tomba”, Parusa mu wari

Careng micasala batas yang matuki ?

Keng Pamamatawad magbayu la bili

At manaliwa pa maroc a ugali

Lugud parang tau, sarili mu, ali.

King Mumunang Tipan, ing Dios tictac bagsic

Uling Upaya Na, buri nang ipakit

Ytang mipairal, Batas a maigpit

Careta nang Judyu a mapag-inakit,

Kening Bayung Tipan, ing Anac ning Tau

Mapamatawad ya, lugud kecatamu.

Tutu pepalbug ne ing yatu canita

Anti mong parusa caring micasala

Keta nang gewa na, nanung sinabi Na

“E cu no sintangan ding mabie Lelangan

Anting depatan cu e na miulitan”,

Itang Pinanari sacsi’t catibayan.

Careng maganaca't matulid a lacad

E ne dapat ibie ing pamamatawad

Detang micasala, ugaling marawac

Ilang panupaya at luguran sucat

Anti mo'ing Tulisan keta king Calbaryo

Patawad binye Na, dela Paraiso.

Artesia, Ca USA Aug. 12, 2013

Rafael Maniago Masanting yang mugse tutung ebidensya

iting leuryadu king pamasala na

ing kapatawaran, peka-maulaga

pinanari Ngana, oyan makule ya

lugud ning Dios Ibpa, papatune na pa

masyas nang pakibat ning budning poeta...

Ing tutuking tikdo, I Kang Ely naman

parusa igawad, gewang kasalanan

king metung a taung, mewala king dalan

pakatingid tamung matulid nang sangkan

kaylangan tanggapan, alang kapilisyan

matibe nang puntus, king matuliranan..

Elysian Tulang Liham . . .

.

Kalimang Talakad

.

.

Nung pakasuryan ing king Tipan milyari

Bayu ing patawad mepalu no reti;

Anti mo ing Tatang, king bie tamu keti

Kabang mamalu ya king anak sasabi

“E muna ulitan ing matsurang iti;”

Saka ne kaulan kaibat nang mayalti.

Keti yatu tamu dakal ordinansa

E mu Amerika o kaya Pampanga

Miyayaliwa la iting papatung da…

Makulung kabang bie ban e maulit pa,

Atin kamatayan matas a parusa

Uling iyang bage ketang mikasala.

Lawen yeng Singapore, alimbawa namu

King bayung miyulat nitang “OSAC” kanu

“Accurate” ya ini ngara pang babandu;

“Ing bansang mesabi iya ing mituldu

Mababa yang dili king mabilug yatu

Karas na keng krimen halus ‘zero’ ne mu.”

Uling ing parusa iti yang mumugit

Iyang kamatayan muna deng ikabit

Arap ding publiku karelang ipakit

Ban e la makyapus deta mong manakit,

At kareng “petty crime” ing bye dang pagsulit

Latigung kabayu padugpa king buldit.

OSAC - Overseas Security Advisory Council

Singapore 2013 Crime and Safety Repo

Rafael Maniago

Oren deng poeta, kaniting Crisotan

king pamag-matulid, pali ning labanan

parusa igawad, I kang Ely oyan

pamatutwanan na, ning balang balayan

ing pamamarusa, karelang gagampan

ipamasala na, batas yang tutukyan...

Agpang kang Kang Amor, iting kayang balu

patutwanan na ngan, patawaran pamu

banten taya ngeni, lub nang sisilakbu

king amamung siswan, ibugnus nong paslu

ing kapatawaran, masilbing patutu

king katunggali na, a-makipatlalu

Canam a Talacad, nang

ALMARIO “amor” C. DE JESUS

PANIG - PATAWAD

Bayu na aranas, casakitang sidsad

Yta nang San Pedro, Caya na inawad

Nung micasala ya, ing cacung capatad

Pitung Ucdu dapat, ing bye cung patawad?

Ali pekibat Na, king Caya mipalad

“Pitung Ucdu a tia, Pitung Pulung ladlad”.

Ing Meliling Anac”* turu at aral ya

Keng Pamamatawad Ibpa king Anac Na

Anac a miglayas, migwaldas king Mana

Malugud a Ibpa malwat manenaya

Agyang nang depatan magbalic ya sana

Ing ‘gang casalanan ing Patawad caya.

**Nung bisa cang saya tumibe catawan

Ing pamamatawad ya nang kecang gawan

Milisya king sakit, pusu't pilubluban

Mibaba ing presyon, carug alabanan

E anti mo retang, ala nang isipan

Nung e ytang casbu, at maki-ablasan.

Manyaman ping tutu, ing mipanupayan

Lasa na at yumu ning pulut pucyutan

Dapot keng linamnam at peca-manyaman

Ing kecang casalang ya ing patawaran

Nuan pin ing mapamie’t, mamatawad naman

kesa keng tatanggap at mipatawaran.

*Prodigal Son

**Research, Dr. Robert Enright

.Ely Salasar

.

Kapitung Talakad

.

.

Deng pung binanggit yu aral lang matulid

Alimbawa la ren bimie keti sulip,

“Ing Meliling Anak” bayu ya migbalik

Kening talimhaga tutung migkasakit,

Ing pamamatawad, pitung-pulu’t ulit . . .

Ninu kekatamu kaniti menakit?

Ing Ginu tamung Dios anyang parusan ne

I Adan at Eba’t ing ubingan abe

Keta king Genesis, karin abasa ke

King kapitulu tres, katorsi-disinueve,

Ing parusang iyan angga na pin ngene

Yatu ne ing yatu e pa miwawale.

Iyang ubingan pin oyan pang gagapang

Ketang kayang buntuk karin daralpakan,

King pamamanganak ing babayi naman

Ing metung nang bitis atyu king kutkutan,

Obra ning lalaki itang e tutuknang

King pawas na’t daya agyang tumwa ya man.

Bayu ke isara ining paglaban ku

Timid keng matigik – “Parusa ing ustu!”

Nung wari keng gintu ban maging pulidu

Dumalan yang api’t pukpuk ning martilyu,

Yan ing gawan kareng mikasalang tau . . .

“Nung alang parusa, ala nang impyernu.”

Cawalu at Tauling Talacad, nang

ALMARIO "amor" C. DE JESUS

PANIG - PATAWAD

Yca ing sinabi, at kecang Amanu,

Parusang mipatung, caring nunu tamu,

E pa miwawale, yatu ne ing yatu;

Macanyan cabagsic, ing paintungulan mu,

Nung pane parusa, buri mu king tau,

"Ala na ing lugud, purus nang Impyernu”.

Manang casalanan, mipatawaran na

At ing meging bayad, Crus king Galgotha;

Agyang y Muhammad inyad na cang Allah,

Detang casalang na mipatawaran la,

Ketang depatan dang pamamugbug caya,

Ding tau king Ta’if, miligtas la sana.

Y Papa Benedict, dinalo Lebanon,

Panaung “Civil War", yang capalipalian,

Nung buri yu ngana, ing catajimican

"Capatawaran mu, ing dalan yung tucyan"

At canita tucnang sablang cagutgutan

Labwad ning Lebanon, tajimic neng miuman.

Anti mung panyara, mamatawad tamu

Kecang caisipan, tucyan ne ing Ginu

At carin ta ackit ketang pamamintu

Yti macacayap ketang sarili mu,

At tanggapan taya masanting a premyu

“Bunga ning Patawad, lumaya cang ustu

Rafael Maniago

Rafael Maniago

Kaybat ta lang dimdam ding adwang poeta,

ing pilabanan dang masakit a tema;

Parusa ing dapat karing mikasala

a pepatunayan, nang Kang Ely ngana,

"Dakal lang puntus ku a maka-reserba

patutwan ku keti". pi-ult-ulit na.

Kabud na meramdam king matning pakibat

king e na a-bata, agad yang memuklat

ining Kakang Amor, "Kanaku e sukat

ing miparusan ya ing taung migkalat,

lalu naman ngana, maglinis yang sukat

mipatawaran ya, palisan ing dinat."

Kaku ya mitukid iting pamanusga

ring adwang poeta, anting Lakandiwa

keng kakung timbangan anting paganaka

ding mingatbang panig, ding pelad dang diwa

parewu la bayat, e tumwas e baba

itamu ing sanak, testigo kong bina...

Dakal pung salamat keng kekatang kubu

king dulang a lande, atin tang pisulu

deng pikandutan tang asan a piritu

sidya ring poeta, para kekatamu

kinabsi ta murin, king rima at bersu

palakpakan ta la, anting mag-mayumu...

Crisotan para King Aldo ning Kapampangan

Agosto 2013

Sukat ing Parusa : Ely Salazar

Sukat ing Patawad: Amor de Jesus

Lakandiwa: Paeng Maniago

ent History

Almario C. de Jesus

Almario C. de Jesus

12:59pm Aug 16

Galamanung matalic ing babye cu cang poeta Ely Salasar king cagiwan nang manapse matulid king rima at bersu; Cang Lakandiwa, PLI Paeng D. Maniago, puge king gelingan nang manantabe caring mag-Crissotan; Puge king ANP Rene Alzadon, king masabal nang mabiasa la reng Capampangan keng carelang cultura at litaratura; Pasalamat at miyabe cu keng Crissotan at midagdagan ing ditac cung belwan. Luid ya ing Amanung Siswan