Gawa Catang Poesya

GAWA CATANG POESYA

Neng Almario "amor" C. de Jesus

(Ing Agila Ning Apalit)

I.

Keng pamamasa cu,/lubus mica diwa,

At nung macananu,/ ing gagawang poesya,

Anya nung bisa ca,/ manigaral cata,

Ketang pamanyulat,/ keng bersu at rima.

II.

Anya misip nacang,/ tema a masanting,

Gauan mung titulu / itang tataginting,

Deng kecang tumaila / itang cacalingking,

Keng panga apse da / sasabeung tambing.

III.

Ngeni cutnan daca,/ nanu ing buri mu?

keta nang estilu,/ at sucad a ustu,

Pilan a sylaba, / ing agyung gawan mu,

Labing adua, walu ? / bilang lang exactu.

IV.

Ding linyang gagawan,/ yla ding talata,

At maca rima pa,/ ding sepung salita,

At potang basan me,/ nung bersu la't rima,

Asna na canayun,/ ing pamagsalita.

V.

Nung balu mu retang / a; e; i; o; u; ngan,

King amanung tawli,/ madalas gamitan,

Potang sane na ca,/ dacal na gagawan,

Pamaglalang poesya,/ anti nang libangan.

VI.

Dapot maulaga,/ ing pamag-"repasu"

Basan me't igale/ ing poesyang gewa mu

Nung keng panatindi / e ca macusuelu

Yta nang simulmul, / gupitan, idayu.

VII.

Magumpisa na ca/ ing pluma talnan me

Cabang mimisip ca,/ temang macabage,

Caban na ning isip / calcalan me Abe,

Amanung mi-simpan / tungal tungal lage.

VIII.

Ing padrun mung tucyan / "Atin cu pung singsing",

E ca misakitan, / at alang saingsing,

Silabang mebilang / detang anam, anam;

At nung walu walu,.../ "Sintang Cayanacan."

acdj.7/8./2020

Artesia, Ca USA

(Balen Apalit, Labuad Capampangan)