Dase Keta King Marangle
DASE KETA KING MARANGLE
Neng Almario "amor" C. de Jesus, (Ing Agila Ning Apalit)
Nula kaya menibatan, makayamang darandaman
Detang amanu mung silbag king marangle at kakewan;
Balamu pakiparis me ketang misalbag a pale
Milabas ing pilang bulan, dacal na ca maging dake.
Obat mipatagun naman , ketang kakung kayanakan
misan mikipamalot ku, banda keta king paglawutan,
karin ke pin akilala , dalagang kakung pilsintan.
Muna pa mung pamanakit, eku ne buring kawanyan.
At andat maglalawe ku, parati yang makatiman.
Inya mesikan ing lub cu, lepitan ke't pekisabyan.
Cacarug ya ining salu, cacalu la retang tud cu,
Ing pawas cu sasaguese, at bigla cu pang kinau.
Bisa kang minum marimla, salilung ca at painawa?
Munta ka ketang kubu ming makalele keng akasya.
Eku balu nang milyari, obat telan ke'ng gamat na,
Tambeng sinabi cu caya ut balamu mu buri daka,.
"Love at First Sight" ngaku kaya, panwalan mu nacu sana,
Mipatiman yang mayumu, inapsal ke ing palad na
at sinabi cung malale, painuman mu cung marimla,
At ena cu migsalita, ing buri cu balu na na.
Mandilu ku rugung pawas, king pali kung darandaman
At anggang ecu mininum ketang danum nang daralan
E midayu ing pali na nitang kanakung katawan
Mipasnu kung mirarapal, at mengacu keng puntalan.
King kubu da king marangle sasalicut ding tanaman
Bang karin ke magpainawa, ybugnos ing panandaman
Ketang linala nang dase piping sacsi ning bulungan.
Inya e ke acalingwan, ing marangleng penibatan.