Charlie, Ing Cacung Inanac

Charlie, Ing Cacung Inanac

"Careng doctor a balu cu, balen na ning Capampangan,

Pagmaragul ke y Charlie, ketang tagle nang cabiasnan,

Modelu keng pamagaral, angga UP king Diliman,

Ating matibe principyu, tutucyan na't pairalan.

King Parnasu kinbiran ke, bang sumulat cawatasan,

Pamanyulat na king Inglish, malalam la ping tarucan,

Anya naman manaya cu, datang itang cahorasan

Ing beitan nang amanu, ibie na ing cauculan."

Miras mu rin ing pinandit, detang tinipun mung poesya,

Mibait lang e sasaryan, potang talagang datang na,

Uling keng panga belwan cu, mibait cang taung biasa,

Panga balanan mu ngeni, tungcul pa keng medisina.

Calupa mu ecu balu, ot mi anad cu keng poesya,

Samantalang kening bye cu, ing isip cu abogasya,

Dacal cu pin a sinulat, dapot iti ali poesya,

E amanung Capampangan, nune Inglish a salita.

Ketang ti cu Pilipinas, manucnangan Capampangan,

Dit man e linub king isip, sumulat cung Cawatasan,

Obat inyang miras na cu, at America mindaywan,

Cabud na dinatang ca cu, sumulat cung Capampangan.

Metung ca caretang taung canacung pasalamatan,

Alang sawang menamuyut, sulung cu ing pamanyulat,

At peki randaman da ca, ginising ke itang lira,

Anya naman mikilala, meging poeta laureta.

Nung e mu hilig ing poesia, gawan mu aliwang tema,

Malyari cang lalang cwentu, dalit o caya nobela,

Macagawa cang ring Puna o macuyad a commentu,

Keng malilyari kening bye , o balen a tibwan tamu.

Mas mayan mu nung sakali, malayang bersu ing munta,

E na ca mag rima rima o bibilang pang silaba,

Ytang istilung gawan mu, nung nanu itang buri mu,

Ya ing dapat a palwal mu, nung nanu ing king isip mu.

Salamat salamat Charlie, inanac cung caluguran,

Dangal na ca ning pamilya, at mayap ca causucan,

Ity e cu picarine, at canacung tatanggapan,

Bucud mu ing ica Charlie, ing canacung Pipangutnan.