K A P A M P A N G A N
Kapampangan...! Yan ing Dai ding pantas at mangatapang;
In Tribu ra ding Maginu... Ing Lahi ra ding Mahalan;
Kapampangan...! Yan ing lagyung milalablab king dangalan;
King bilunga'ning Istorya e na mapda kapilan man;
Kapampangan...! Ing Amanung kasing-lambing ning kundiman
Kasing timyas ning dalit da ding Angheles king Katasan.
Nanung kayapa'ning tau ing liliwan mumo sana
A emu malyaring akit karing mapuring anak na...?
King talino at sipagan, king ganaka't pamakyaga,
King hinhin at kabanalan, uliran la't manimuna;
At lalu nong e mitawli nung king lagyung pamalsinta
Pablasang ing Kapampangan nung lugud ya alanangga.
King bye na ning Kapampangan ing "kredo"nang matas dili
Ya ing mye, yang e manginu, e busabus o dwahagi;
Buri na pa ing mate ya, e mu sana madakati
Ing banal nang katuliran, katimawan ampon puri;
Ing Istorya yang patutung kapilan man e matawli
King panyanging Kalayan agyang king pisak ning bengi.
Bakit kaya makanyan ya iting lahing Kapampangan
Bakit kaya mataluktuk ing asal na at kaniwan?
Bakit kaya parati uang manimuna at uliran?
Iti... uling ing daya na dayang lusuk king kamalan
Dayang tune Mahadlika... Dayang Datu...dayang Lakan.