Eme Picarine Ing Capampangan

Diwa neng Almario C. de Jesus, (Ing agila ning Apalit)Magbanda ca California, dacal lang taga Pampanga,Masalese la cabilian, at masanting la pa Obra.Damdaman mung magsalita, balamu American laDitac lang manga-pampangan, bakit caya marine la.Nung king bague, aliwa pin , ing bie keti America,Gawan mu itang galing mu, bang ing bili masensu ya,Agyang keng pamagsalita, pakit mu ing daig mulaDeng Maputi at Matuling, king sariling amanu da.Dapot e manga-baldugan, kelingwan me ing AmanuIng Amanung beitan mu, anyang luntu ca keng yatu,Nung metung cang Capampangan, ya na ing meging tatac muA mikintal ketang salu, pusu at caisipan mu.Anya sana caluguran, nung tune cang CapampanganCaretang kekang cabalen, ing Amanu yang gamitanEme dapat picarine gamitan ya at samasanMacanyan ya mung e matda sala ning amanu sisuan.Detang cayabe aguman, ANASI ya ing santungan

Agyang alalu balen da, diasporang meturingan

Itang sabla gagawan da, managcat lang caluguran

Miabeabe tang kimut, ketang banal a parasan.

Capampangan tamu yata, dapat ini yang isipan

At dapat mung pagmaragul itang kekang penibatan

Nuca man danggut ning yatu, iyabe me king balutan.

Eme dapat pikarine, ing amanu mung dadalan.