Kang Almario
A-gpang king gelingan ning kecang panyulat
e na ca mitalwi cacung asiwalat
ining poesya mung mitnu king kasampat
agyang I Cang Rene masdan ya't magulat..!
L-alu't megawa ya caring balang letra
ning dalerayan nang inampang mu keya
senayan yang bina keng pama-mowesya
pamanyulat bersu at pamipa-rima,,!
M-acanyan la wari ding beyit king watas
king amanung siswan e ca macayatras
king pusu bubucal iting sintang wagas
ing salitang beytan agyang nu ka miras..!
A-lben mo reng abe keng kecatang buklud
mitayid-tayid tang pusad alang patlud
e kasi ing sangcan ing lubus tang lugud
king amanu tamung bye yeng tataguyud..!
R-etang aliwa man a alang masakit
e re rugu pansin e re pagmasakit
nune paglibe de bina lang pagamit
acacalingwan deng kayagnang mibayit..!
I-bat pa canita pilan nong sesese
alto-albug nala retang talagale
katnamu mo ngeni itang mamantabe
acacwa tamu pang macasulat dale..!
O-bat e ta mu pa, pakasamantalan
mepalad tamu mong, ditac a cabalwan
susulat poesya angga king cagiwan
ipanyagad ta ne, ala nang atrasan..!
D-etang aliwa mong tune Kapampangan
e-ra balu myuman e no Kapampangan..!
J-esus Maria Josep..! Mipanagalug la
cabang parewu lang tawu la Pampanga
carin la mibayit mibabanda la pa
mecad megaral la carin king Menila..!
E-cu abitasa lubus ayntindyan
deng aliwa tamung cabalen mapilan
milawut lang bagya king balen tang tibwan
acalingwan da ne ing amanung siswan..!
S-opan tala rugu, ketang e ra balu
iting malilyari king balen sumuyu
capamilatan na karing sulat tamu
datang ing panawun saca ra abalu..!
U-ling balang ditac a kecatang yambag
maragul neng bage king dane palawac
neng mitayid-tayid no reng misusulat
macabe ne palang sicoti ing sucad..!
S-alamat king puge peparas mu cacu
pagkapilitan kung mitayis cung ustu
caylangan na cata ning balen tang tutu
ketang cagiwan ta kecatang isundu..!
(Poesya nang Ca Rafael D. Maniago -
Rafael Maniago
Deng tawli kung a-babasa, balang amanung medamput,
anting talaga mu naman, malalam la panga-gawuk,
nukarin mo panibatan, nukarin mo pemag-laput...?
taneng misna kung miyamang makabasang maglagutuk..!
Keng kanakung sarili mong pamag-dilidili keni,
kabud na ku makasulat, kabud naku mawiwili.
metagkil ku panamdaman, mibangun ya ing sarili;
menagtal kung balang bersu, kering tangke ning palsimi...!
Ing tutu na kang Amor, pasalamat dakal keka...
'ting panawun mipatutud, amanu kung papaynawa.
ginising mong pasibayung manyabitan karing lira;
dudugarug lang pasapyo, tumerak king pamalsinta..!
Isundu tang alang tuknang, king amanu tamung siswan,
pamanyulat poesiya, malwat ta nang inumpisan.
RDM
· May 21, 2016 · Turin, Italy ·
Bisang isalubung mayumu kung timan
Poyeta ning narra sucad menibatan
Matantung aisip pugue ing iyampang
Kambe ning pangadi ning aldong yung beytan
Manasa ni...ng Guinu dinan nang sikanan
Maglakbe makaba keti king sikluban
Mipmu king dengalan watas ning apalit
Lalakad king bie daklat a matulid
Lasip ampong faina ikayung manyaplid
Mataram yung pluma sukab e milapit
Dapat ning kayapan kekayu meyakit
Bante ning Parnaso gamat yu miyusig
Masaplalang aldo pu ning kekong kapanganakan luid luid luid!!!
Pl Almario C .de Jesus
*************
ING AGUILA NING APALIT
(PUGAD NANG MISNANG TIBE)
(PUGUE PARA QNG AGUILA NING APALIT a y Poeta Laureado Intl. Atty. Almario C. de Jesus
Mala-Soneto
Irvin Harvey Rivera
Siuala Ning Maliwalu/Anac Ning Baculud
March 10, 2018
Luid ia ing Aguila caring Poesia na
Pamangulis na qng mataram nang pluma
Ding sunis o dalit at ding balang letra
Macabie lang diua pangabalangcas da.
Silung! dala mu cung iterac ning angin
Gamitan mo retang bagius mu't magmain
Sulapo mu cu qng lele da ring batuin
Qng babo ning bigua't bulan anti mu rin.
Amuiutan mucu't dinan capaldanan
Caring poesia mung mamie capasnauan
Detang quecang dalit ume cong balican
Bang ing ligalig cu mapulid mung misan.
Luid ca oh Poeta Laureadu ning Sucad
Balen ning Apalit ia ing caiang Pugad.
*****
MASAYANG ALDO BEITAN PLI ALMARIO DE JESUS
Puge nang Poeta Amado Gigante
Nandin maglakad kung pupunta marangle
Kanita batyawan ing atbu mi’t pale
Masaya ing sabla anting babie puge
King kalaganapan kening palalawe
Pati na ing palat teterak malale
King labul ning angin at sunis nang babie.
Angga king panuli kukutang king diwa
Nanu kasangkanan ing sabla masaya
Nyang buklat keng FB daka’lang abasa
Ngara iting aldo beyta’ning makudta
Agilang Apalit keti mibalita
Karing kawatasan sinulat na’t gewa..
Metung yang Poeta ampon Abugadu
Malugud king balen at Sisuang Amanu
Agyang tauli na ngeni payabut ku
King makudtang watas ing pamagmananu
Maligayang Beitan… adwan ku king ginu
Kumaba pang bie mu keti babo yatu.
Ban iting Amanung tatakpa’ning lulam
Mirinan yang sala at e mipanpanan
At daka’la pa sa karing kayanakan
Ayagyag mung lugud king Amanung Sisuan;
Ing makudtang watas kekayu ku adwan
PLI DE Jesus dyan yang palakpakan.
A.N.G.
Anunas A.C.
5-21-19