PARA KECA O YNDUNG AMANU
Nang Jaime Gonzales Bacani
Santa Paula, California
Sepyembre 14, 2009
caring balang aldo ycang isipan Yndu
ding anac mung keca malapit o marayu
bustan mung lumapit ke keca't sumuyu
e mu pamibulad ramdam mi kening salu
king malilyari keca melumbe cang tutu
nu' cu magumpisa ban apasyag cu?
yng lugud mi keca daraun ming pasibayu
makabang panaun anti cang mebunglu
at king pangalanat milaco ca banglu
sampaga ca ngening mibabalik yng lagu
munang pasalamat king Mayupayang Ginu
ababau mi na naman yng kecang samyu
nung mong canita anti cang mengalugu
pepaburen da ca ring anak mu mismu
ngeni dadalawan da ca macamal a Yndu
anti mong sula-sulapo yng panamdam cu
cambe ding anak mung mamantabe mismu
at e pepatugut miningat keca at miglualu
ban king pangalugmuk mibangun pasibayu
manibatan ngeni Yca yng kecaming ybandu
biasa Ya pin at malugud Yng Apung Ginu
makayantabe Ya at maglibutad kecatamu
balu Na ngan yng kecayung sentimyentu
capilan man e Na cayu likwan meulilang todu
pekilaban da ca retang Poeta Nang Sugu
yng tagumpe bista man panayan ta ya pamu
king pamagmasusi ding watas a Cabalyeru
Art, JR at Amor bayung Poeta Laureadu
sasaup king Ari at Prinsipe ning Parnasu
putung lang dangal anting corona mu
caring Cabalen ngeni ypanagkat tamu
makatua man o detang bayung sibul mu
ytaguyud ta ya sanang pare-pareu
at sesen yang matapat yng Yndung Amanu
ykwintas ta ya caring batal anti mong gintu
nung sakaling datang la detang dayung amanu
a bisang manyira king cayang pangasagradu
lugud tamu king Yndung Amanu ypakit lalu
nanu mang malyari e ta capilan man paituksu
ya mu cabud palual caring pluma at asbuk tamu