1). DITAC NAMUNG PAMAGSANE
neng almario "amor" c de jesus-
Sigue abe't caluguran, dagdagan ing pamagsane,
At malagua cang mabiasa, pamanyulat at gumale,
Sigue pucpuc, tira bira, anti ca mu waring pande,
Agyang masyas ya ing bacal, a yaliwa me ing aske.
Nung lalalang cang poema, macanyan ing kecang gawan,
Mamili cang buring tema, yta ing planu mung tucyan,
Detang amanung balu mu, caban ning isip misimpan,
Calcalan mung mirarapal, paca-simen at samasan.
Ding misulat balican la, nung ating dapat ibayu,
At ituki la king Rima, dalit mu lang anting bersu,
Bilangan la reng sylaba, lapat mula ketang metru,
Ing santing na ning lelang mu, manayun yang siguradu.
Anya ngening balu mu na, mayan ing gagawang poema,
E na ca sa micacunu, sigue magumpisa na ca,
Deng abe mung talasulat, a poetang menimuna,
Ylang maging cayantabe, bang king Amanu mabiasa.
acdj. edited 5/02/2016
DITAC NA MUNG PAMAGSANE
neng Almario "amor" C. de Jesus
Sigue abe't caluguran, dagdagan mu'ng pamagsane,
At malagua cang mabiasa, pamanyulat at gumale,
Sigue pucpuc, sigue pucpuc, anti ca mu waring pande,
Agyang masyas ya ing bacal, a yaliwa me ing aske.
Nung lalalang cang poema, macanyan ing kecang gawan,
Mamili cang buring tema, yta ing planu mung tucyan,
Detang amanung balu mu, caban ning isip macalcal,
Yla ngeni reng sisimen, at isulat mirarapal.
Ding misulat balican la, pota ating dapat ibayu,
At ituki la king Rima, dalit mu lang anting bersu,
Bilangan la reng sylaba, ilapat mula ketang metru,
Ing santing na ning lelang mu, manayun ya canyang luntu.
Anya ngening balu mu na, mayan ing gagawang poema,
Ena ca sa micacunu, sigue magumpisa na ca,
Deng abe mung talasulat, a poetang menimuna,
Ylang maging cayantabe, bang king Amanu mabiasa.
acj
Artesia, Calif. U.S.A. 1/17/2012
&***********
2). DIUANG MALIAP-
NENG almario "amor" c de jesus-
Diuang Maliap Ning Candaba, casanting nang Panalucian,
Ing delanan na ning bie mu, pamanintun Pagcabiayan,
Dirutan me yting yatu, miparas ca pati Iran,
At dacal la ring amanung, abalu mu't Pegaralan.
Dapot sumangid na niti, dela mu king Pamag-libut,
Kena mu king balutan mu, ytang Plumang e Lalambut,
At ngeni pin ginamit me, at keca na lang Kelutcut,,
Diuang Maliap king caban mu a maluat nang Misalicut.
Cayantabe ning gulisac, ning amanung misnang Tapat,
Agyagan ding cayanacan, mibangun la at Sumulat,
Ketang Amanu Tang Sisuan, milele na king Pagsalbat,
Lulucuban ning dalumdum, pantunan yang Salat Salat.
Cayanacan Capampangan, damdaman me ing Gulisac,
Ning Amanung sasaingsing, pagdulapan ta king Pisac.
acdj 2/25/16
(Puri at pamanlalawe keng sinulat nang Bien Yabut ning Candaba)