Bulan Ning Enero, (Cang A.B.T)
Neng Amor
Istung bulan ning Enero, masaya la ngan deng Tawu,
Uling iti ing umpisa na, nining daratang a banwa,
Ytang mumunang aldo na, pamagsaya lang capara,
Papamacbung labentador, deng lusis at aliwa pa.
Deta namang ating "Birthday", asnang lubos ing ligaya,
acakit mu itang timan, micabus ytang pabanwa,
at agya mang midagdagan ing edad a dadalan da,
Pasalamat la qng Guinu, cacaba yta nang bye ra.
Keng aldo mung kebaitan, babye ku'ng mayap a oras,
Pangadi mu, ing agyu cung, iregalu't ibye keka,
Uling ini nang bili cu, malungcut at alang cualta,
Dapot mayaman qng lugud, keng panlalawe cu keka.
Happy Birthday, ngacu wari, sana cumaba pa'ng bye mu,
At atyu ca king "happiness", siping ning bayung sinta mu,
Ining daratang a banwa, pangadi cung minunu pa,
Ing grasya ampo ing tula, manatili sana keca.
Magsaya ca ngening aldu, busal ding malugud keca,
Matula la reng anac mung, angga ngeni abe raca,
Ding mangalagung apo mu, misuglulung pacandung la,
Manyaman la retang tubu, keng puhunan na ning ta.
acdj
&********&
CAPURIT A AMANU -
"King bistaman maintang cu,
Nung keng cualta ulila cu,
Yampang ke ing pusu cu,
lulugud keng Apung Ginu."
At agyang calulu cu mu
Tapat ing pasalamat cu,
cayamanan na canacu,
pamakiabe tau,.
Ditac mu ing cacung beluan,
dapot balu cung gamitan,
pamaglalang cauatasan,
king amanung Capampangan.
Tapat a pasalamat,
careng abe'ng talasulat,
E ra pala acalinguan,
ing aldu cung kebaitan.
acdj May 21, 2018
&*******&