Pamamatauad

Pamamatawad

Neng Mely G. Catacutan

2/16/2012

Itamu ngang tawu mabibie king yatu,

Datang na ing oras 'ting akaingkwentru,

Kayabe king obra o cacaluguran,

Nanuman ing gawan e apangilagan.

Nung panusignan mu ing kaplas ning lub mu,

Ketang kaorasan mag adwa'ng isip mu.

Misip kang banayad ketan me'y dila mu,

Milang cang apulu at layun dumayu.

Ing usuk cu sana pakiramdaman yu,

Alang mimwang tawu maging ka-obra yu.

Iti yang tindanan anyang magobra cu,

Tiru nang apu cung peparagul cacu.

Ing pamamatawad masakit ping gawan,

Lalu na mesugat ka kapanamdaman.

Mipamatawad sa at mipangalinguan,

Ban kecatang isip lumwalas mu naman.

Antiya kanini metung a kasebian,

Patawaran tala miki kasalanan.

Ban keta nanumang kasalanang gewa,

Ing kapatawaran ibie na ning Igpa.