Ing Mayap At Ustung Pamaglalang
neng Almario C. de Jesus
Nung keca yang pibulayan, mas mapali ya ing aldo, ngeni nang casalungsungan,
At deng cutu ning kecang bwak, panginisan da ca buntuc, anti la waring tamumu,
At nung kecang pibulayan, degulan da retang panas, mas madagul careng dutung,
Ytang buri mung alaga, palac nang asna cabangis, caretang nang mangabangis.
Keca nang pibule bule, nung deng bitis mung daralpac, casing dagul nu ning banca,
At deta nang kecang butul, ela masyadung matibe, payat la at malambut pa,
At pibule bule mu na, ing lasa da retang prutas, anti la waring sabun na,
At ing uran a papatac, ketang banwa manibatan, dumalan ngan lalamunan.
Keca nang pibule bule, ing sala da detang tala, bulag anting talibatab,
At ing bulan king catasan, ala ya king cabilugan, at sampad ya nung lalawan,
Keca nang pibule bule, detang adwa mung mata, sindagul nu ning asbuc mu,
At ding ayup king cakewan, e nu dalit o masyuc man, at caung na ing daraptan.
E mu na pibule bule, dili mung magsasarili, keting yatu manucnangan,
At ing puso mu king salu, ketang dimla at mas ya pa, anting batu a marinla,
Pibule bule mu na, nung ing benging daralan, e ne maging ganing aldu,
Detang dutung a tanaman,keng paligid macatanam, malangi lang anting butul.
Emu na wari pagtachan, manintun pamagpalino, kenging sablang mepalyri,
Obat ing hegana gana, mayap at ustu ngan, alang bawas alang culang,
Ala cung balung i palinu, metung ya ing capakibatan, at ity ya ing catutwan
Ing Miglalang a Dios, Dios yang ustu at cayapan, ya ing dapat a panwalan.
(N.B. Ing tema o diwa ning poema menibatan ya keng metung a poesyang English,
a nung e cu magcamali ibat cang Mr. Gozum. Pamanigaral keng 8 x 8 x 8 syl. balang
linya o talata.)