Almario "amor"  Castillo de Jesus
Ing Agila Ning Apalit

Pamananggap Galal, Anting Poeta Lawredu

This composite poem was declaimed by the author when he was recognized as Poeta Lauredu Ning Capampangan at Portland, Oregon on September 6, 2009.

PUGUE CARING SABLA

(Bayu cu pu malaus keng canacung catungculan a gumale poesya, Manyad cung pinandit a yagcas cu ing “Pugue”, “Pasalamat” at “Pawaga”, caring sabla.)

Ing mayap a caorasan, kekayu kaku yang babye,

Pasalamat kung maragul, tinggap yukeng masalese,

Qng Aguman Capampangan, Atsing Mina Talajare

At caring mangasipag at mangalagu nang Cayabe.
*

Pugue cang Sir Ernie Turla, Pamuntok ning Academya

Qng sipag na at cagiwan, ing ANASI mitatag ya,

Cayabe ne y Atsing Anggie, ing malagung cabangal na,

Lulub capa mu bale ra, asnang saya sagana ya.

Luid ca Poeta Lauredu, Renato Bonus Alzadon.
Anting Ari ning Parnasu, babye cu po’ ing cagalangan,

At tuki cu gulutan na, keng masanting nang parasan,

Isalba ya at pamingwa ing Amanu tamung siswan.

At cang Sir Benjamin Yuzon, UPLI tatalnan na,

Salamat , pagmaragul cu, itang galal a binye na,

Midinan cung inspiration, menigaral, migsicap cu,

Disnan cu ing paintungulan, milub cu ketang Parnasu.

Careng abe cung poeta, at caaptas Academya,

Piling Poeta Lawredu, mangayap la ampon biasa,

Lalu na qng cacung maestro, poging pintor Raf Maniago,

At cang poeta Pids Rivera ning ANASI’ng secretaryu

Pasalamat cu kekayu, kilala at tinggap yucu.

At cang Ka Felix Garcia, pamuntuk na ning AGTACA,

Secretaryu Rom Rodriguez, principi na ning Parnasu

Ing “Rotarian” Josie Henson, nitang DILA at AKAP pa

Asyas cong telacaran na, ning Bonduc na ning Alaya. . .

Capampangan a malugud, macamal a Amanu da!

See full photo album >>

Detang matwang talasulat, galang culang ting sasamban,

Guintung “libru” a bisni ra, isundu tala e pabustan,

Caring mitmung yumung dalit, igale cung misnang miuman,

Gng Dios, Balen, parang Tawu, matulid at catalauran.

Mebye cung meging poeta, at qng lira manigtigan,

Mye cu’t mate poeta na, ning Poesyang Capampangan.

POEMA

“Ing canacu pung Poesya mica titulu yang “Lugud qng Mal a Indu” at iti iparikil ke caring sablang Indu, lalunglalu na caring atyu ngening pesitagun.”

LUGUD QNG MAL A INDU

Ing lugud qng mal a Indu nung ipinta me ing cule na,

Pinturang guintu at pilac ena abye ing tingcad na,

Uling ing sintang binye na menibatan qng pusu na,

Pinunla na at sinese meging ligaya na kaya.

II

Ninu wari y Indu mu? anting metung yang cometa,

Mabilis pangabulasoc kinislap menibat banwa,

Qng dalumdum na ning bye mu pepakit na ytang sala,

Biklat nu ding kekang mata lugud at dalise sinta.

III

Siyam a bulan mabuktot ya cambe ning sakit at dusa,

Alus ytang camatayan yang meging cayantabe na,

Ena na picabyang yta ligaya na’ing mibait ca,

Uling daya na ca’t laman ning laman na at daya na.

IV

Magcanta yang papasusu qng candungan matudtud ca,

Terac na ca’t panaplusan at panirug ing uma na,

At cabang daragul na ca ytang mayap tuturu na,

Lugud qng Dios, parang tawu mal a balen a tibwan na.

V

Anya nung maangu ne bye pacamalan a Indu mu,

Anti neng mepitna keka ing sala na niting yatu,

At ytang silbag nang lugud nitang mal a Guinu tamu,

Cabud na mipanpan keka calmang lumbe pibatan mu.

VI

Ala na ngening mamapis cacaul, mumuma keka,

At ala nang mituturu sasaup keka mamingwa,

Ninu ing agad lapitan qng busal na nitang lugma,

Dili mu na mung tatangis pibatan mung meging calma.

VII

Talaga yatang macanyan ing mabibye lalam banwa,

Masaya cayabe tula ating lungcut tumulung luwa,

Anya iti tanggapan mu yumu’t pait alducan la,

Neng iti yang caburian na nitang Dios tang Mayupaya.

VIII

Uling deng sablang melalang tutuki la ketang agus,

Nung nucarin ytang sabla ketang dagat ngan tataglus,

Keta nang pangabait mu nanung tawling caulyan mu,

Ytang datang mu pang bucas gabon ni’ya ing pagkeran mu.

IX

Anya ica o penganac emu dapat cacalingwan,

Cabang caba na ning bye mu itatac mu qng caisipan,

Ing lugud ning kekang Indu yti alang cayangganan,

Tapat e pamagcunwari lante guintu’ng panandaman.

X

Puryan la deng Indu tamu ytas tala qng calucan,

Ytang puri dang ingatan eta mu dapat musingan,

Casampat na sana Indu nung malyari mu sang gawan,

Tipunan cu ngang sampaga mitmung lugud keka iyampang.

7 YEARS AGO TODAY

Thu, Sep 3, 2009

Antonio C Quiroz to Almario C. de Jesus

September 3, 2009 at 7:07pm ·

Mayap a horas queng coronang laurel a tanggapan mu. Isulud meng marangal quing canuan mu, bilang patnube quing lugud mu quing labuad at dila tamu. Misan pa payabut que ing maragul a abrazo at carino queca. TQ.

x x x 

Ing Sala ning Biasa

PL Almario C. De Jesus-

Dakal la ring tau mika-karangalan

A magdalang sala keti king sikluban,

Dapot deting aslag tula ding tatalan

E la lupa-lupa king kapilubluban.
*

Ing sala ning metung atin yang darala

Para kareng tau a bisang mikwalta,

Itang kasumangid, ing pun yang mipala,

At ketang kangatba nung nanung mibata.

*

Miyayaliwa na ing sala dang babie

Karetang aguman ambus na king bale,

Dapot atin biasa nung ya na ing mamie

King lalto nang aslag, dapal kung lelele.
*

E mapilan besis iya akarungut

Ining panginuan ku nung ya na ing kimut,

Ding kayang amanu manyaman la langut

Mayap lang akmulan uling alang samut.
*

Ing lagyung misabit iti tituladu

De kampanilya yang talapanlualu

At poeta ya pang meging laureadu,

Anya ing gelingan masala king salu.
*

E makatas nune mababa ya ing lub

King nanung sigalut e gulping lulusub

Pitimbang-timbang na ing lual at kilub

At kareng tatayid, alang misusubsub.
*

Ing amanung sisuan, amana nang singsing

King poder na’t diwa lunto ya ing ningning

Lakwas yang malugud ampon e sasaingsing

King pamaningat na keng gintung maningning.
*

Yang sala ning biasa, ing buring bagayan

Keni lalam banua iyang tatangalan;

Ngening kebaitan na, tune pupugayan

Almario de Jesus, ing lagyung dangalan.
*

ELY SALAZAR, Poeta Liriko, Parnasu Ning Capampagan

San Diego 21 Mayu 2017

”Rosa at Andi, Pengari”