E na tataekinaki Iesu, ke e na tataekinaki Ana Euangkerio? Angiia aaro n Kristian a bon aki tataekinna ana euangkerio Iesu aei bwa a kaatuua riki taekinan rongorongon Iesu - antai Iesu, antai Ana karo, E bungiaki iaa, Ana rekenibong, teraa ae e riki ni Maiuna, teraa atuun Ana kab'arab'ara nako, Ana miterio nako, Ana kakai nako, teraa aekan anuana, teraa kawaina, teraa ae e riki i m'aain matena, tain matena, ao n tain utina, nakona nako Karawa, ao rongorongo riki i bukina aika mwaiti.
I nanon taian umantabu ao e aki toki n takakaruaeaki i rouia ana toro Iesu, taeka n aron, "Kam na "Katootoonga maiun Iesu", "Kakoauaa Iesu", Tii ngaia Kawain te Maiu", "Tii Iesu ae kona ni kamaiuko", Kawara Iesu ao E na motikarawam, Nakon Iesu ao E na buoka am kaangaanga, bon tii Iesu ae e konaa n katoka takam, ao a mwaiti kurikuri riki, "Iesu aei, Iesu arei" .
Te kibunikoora are e bati ni tataekinaki ao n aneneaki, man te Moanibong teuana nakon te Moanibong teuana, inanon tain korean te rongorongo aio bon te anene ae, 'Bon tii Iesu Kingngin te kab'aia.' Ao tao teraa te kab'aia ae nanonaki ikai? Te kab'aia n te maiu aio? te kaubwai?
E taku Iesu bwa akea ae e na konaa ni kamaiuaki bwa tii ngkana e weteaki i roun te Tama. E aki roko Iesu bwa E na weteira, E aki roko bwa E na raira nanora, E aki roko bwa E na kairiira nakon te taromauri. E aki roko bwa E na 'kamaiura', ao bon akea Ana taeka nakoira bwa ti na katootoonga. Ngkana E aki roko i bukin bwaai akanne ao teraa raoi bukin rokona?
BUKIN ROKON IESU
E nangi teretere ao e nangi mataata are e koreaki n te B'aibara bwa e roko Iesu nako aon te aba bwa "N na kaota rongorongon Uean te Atua, ae raoiroi; bwa ngaia are I kanakomaiakaki iai" (Ruka 4:43)- "BWA NGAIA ARE I KANAKOMAIAKI IAI!" E aki kanakomaiaki Iesu bwa e na weteira; E nakomai bwa E na kaotaa rongorongon Uean te Atua.
Uoua te ngaa tabun te ririki i mwaain Iesu ao e bon tataekinaki te rongorongo ae raoiroi aei i roun te buraabeti ae Itaia: "bwa E kabirai Iehova, bwa N na tataekinna terongorongo ae raoiroi nakoia akana nanorinano" (Itaia 61:1). E tataekinna te rongorongo aio Itaia ao bon te rongrongo naba aio ae e moan taekinna te Atua (Te Taeka), aua te ngaa te ririki i mwaain rikina bwa Iesu, nakon Atam ao Nei Ewa: rongorongon 'uaan te kai ni maiu are n te n ne-n-aroka' are e na karekea te maiu ae aki tootoki.
Uoua tabun te ngaa te ririki n nako ao Iesu E tuangiia Ana reirei, "Kam na nako n aaba ni kabane, n tataekinna te euangkerio" (Mareko 16:15) Teraa te euangkerio aei? Ana euangkerio Iesu are E kanakomaiakaki iai : te Euangkerio are rongorongon Uean te Atua (Ruka 4:43)
Te mwioko aio e bon aki tii katukaki i rouiia Ana reirei Iesu ma a bon m'iokoaki naba iai Kristian ni kabane n taai aikai bwa a na tataekinna te rongorongo ae raoiroi aio, are i bukin Uean te Atua, ke, Abanuean te Atua, nakoia kaain aaba nako aika a tuai n ongo te rongorongo ae raoiroi aio.
Tao i bukin teraa bukina ngkai ana kaongoaki aaba ni kabane te euangkerio aei? "Ao ane e na tataekinaki euangkerion Uean te Atua aei i aonaaba ni bane bwa te bai ni kaotioti nakoia botanaomata ni kabaneia; ao ngkanne e na roko naba iai te toki" - Mataio 24: 14. Te 'toki' ae nanonaki ikai bon tokin aia waaki botanaomata ni kabaneia i aan aia tautaeka bwa e nangi roko te Tautaeka ae boou - ana Tautaeka te Atua are e na kaoka Uean te Atua nako aon te aonaaba. Aio bon te koaua teuana ae e aki ataaki ao n aki tataekinaki i rouiia aaro n Kristian n boong aikai. Bwa bon iai ana 'toro' Kristo aika a tia ni wareka te kibu aio ma a aki kakoauaa. Ao ngkana a aki kakoauaa ao ana bon aki tataekinna.
"E na roko Ueam" bon teuana m'anewen ara tataro nakon Tamara are i Karawa. Man Ana tai Iesu, uoua tabun te ngaa te ririki n nako nikarokoa te bong aei ao ti aki toki n tuangnga te Atua bwa e na karokoa Ueana. Ao tao e na roko ningai? Ai muin uoua tabun te ngaa te ririki ao e tuai n roko. E na roko ningai? Ti na manga noora riki Mataio 24:14. E kab'arab'araaki ikai bwa 'e na roko Ueam' tii ngkana e a butanako nakoiia botanaomata ni kabaneia rongorongon Uean te Atua.
Bon ngaira taan tataekinna te euangkerio aio n taai aikai, ao ngkana e waereme kabutana i roura ao e na waereme naba rokon Ueana, ma ngkana e waekoa kabutana ao e na waekoa naba rokon Uean te Atua.
E a bon tiku nakoira tabemamaniira nako bwa ti kan bareka rokon Uean te Atua ke ti na kawaeremea rokona. Ma bwanaan te 'Aonaaba Ningabong' e na bon teimatoa ni tataekina Uean te Atua bwa e na kawaekoaa okin Iesu.