Te B'aibara n I-Kiribati
Bon iai kaaokoron ara B'aibara n I-Kiribati ma B'aibara n I-Matang.
Aio bukina:
taian moan B'aibara a bon koreaki n taetaen taai akekei - e koreaki te O-Tetemanti n te taetae n Ebera (Hebrew) ao te Nu-Tetemanti n Kiriiiti (Greek). Ao man taetae aikai a manga rairaki nakon te taetae n I-Matang. Te moan rairaairi n I-Matang e bon kabongana te taetae n I-Matang n te tai anne ao ai aron nikiran taian rairaairi bwa e bon kabonganaaki te taetae n I-Matang are e bati ni kabonganaaki n te tai anne.Ngke e moan kataaki n rairaki te B'aibara nakon te taetae n I-Matang n te Kaituua ni Tienture ( 7th century ) ngkarokoa te ka-21 n tienture aio, ao e reke nakon 450 aekan nako rairan te B'aibara, ke mwaitin ana versions.
Ngke a rairaki taekan te B'aibara ao aomata aika taan rairaairi e bon reke aia tai ni karinii oin aia taeka are a bon taku bwa bon nanon raoi te taeka ake a rairii. Ikai ao e a bon konaa n ibitaki nanon te kibu teuana ma teuana.
Tabeua B'aibara n I-Matang a manga 'kabebeteaki' taekaia. Taan rairaairi ikai a bon taku bwa a nangi bwaka rawawata taekan te B'aibarta are a manga karinii taeka aika a taku bwa e na beebete riki iai tangiia nakoia aomata.Ma ikai e a konaa n kabeebeteaki taekan te Tua ke te reirei teuana are e na taraa n akea kakawakina.
Te B'aibara n I-Kiribati e bon koreaki man rairan teuana mai buakon taian B'aibara n I-Matang are a taekinaki i eta. Irakin aei ao e kakoauaaki bwa e koreaki ara B'aibara iroun temanna te I-Matang ae kaain te Aro teuana ao are e tataekinaki i aon Kiribati bwa ngaia te B'aibara aei bon ana B'aibara te Aro aei. Ngkana e koaua aei ao nanona bwa e bon rairaki tabeua koauan te B'aibara nakon aia koaua kaain te Aro aei. Irarikin aei ao iai naba te Aro teuana ae iai naba 'oin' ana B'aibara, ma okorona ma te B'aibara n I-Kiribati are teuana bon aron tein ao taekan te 'Tua ake Tebwiina'.
E bon kakoauaaki bwa mwaitin ara taeka ngaiara kaain Kiribati e bon nangi warereke n kabootauaki ma aia taetae reeiti ni I-Matang nako. Ao bukin aei are e a konaa n kaokioakaki teuana te taeka n I-Kiribati bwa e na tei ibukin nanon taeka n I-Matang aika a mwaiti. Ao ibukin aei ao nanon kiibu tabeua n te taetae n I-Kiribati a bon aki roko raoi nanoia ma are e taekinaki n te B'aibara n I-Matang. Ibukin aron rairan te B'aibara n I-Kiribati are kaotaki ieta ao tabeua taekan te B'aibara aika a koreaki inanon te "Aonaaba Ningabong" a na okoro ma are inanon te B'aibara n I-Kiribati bwa ti na kataia ikai n korea are e bon nanonaki n aron ngke e moan koreaki. Ibukin aei ao kiibu nikabane aika a koreaki n te 'Aonaaba Ningabong' ana rairaki man te B'aibara n I-Matang ae te 'New King James Version'.
Ti na butiia ngkanne taan wareware n te "Aonaaba Ningabong" bwa ena bon ibuobooki nakoimi ngkana kam kabonganai ni kauoua te B'aibara n I-Kiribati ao te B'aibara n I-Matang ae tao uoua ke tenuua aekan te rairairii ibukin te kaotaata.